Жекпе-жектің бірінші раундынан бастап Ф.Шәріпова қарсыласын бұрыштан-бұрышқа тықсырып, белсенділігін байқатты. Ал қарсыласы М.Колева қорғанысқа көп көңіл бөліп, сәті түскенде ғана қарсы шабуылдаумен болды. Раунд сайын қарқынын арттырған отандасымыз дөп соққыларымен көзге түсті. Болгар қызы да бұл кешке жақсы дайындықпен келгенін, тәжірибелі боксшы екенін байқатты. Жерлесіміз 10 раунд бойы соққының астына алғанымен, қарсыласы жекпе-жектің соңына дейін нокаутқа түскен жоқ. Төрешілер жеңісті бірауыздан отандасымызға берді.
Сөйтіп, Фируза Шәріпова жеңіл салмақта WIBA және WBU тұжырымдары бойынша чемпиондық атаққа қол жеткізді. Сонымен қатар, ол әйелдер арасында кәсіпқой бокстан Қазақстаннан шыққан тұңғыш әлем чемпионы атанды. Жекпе-жектен кейін жерлесіміз қолдауға келген жанкүйерлерге алғысын білдірді. «Мені қолдауға келген баршаларыңызға алғысым шексіз. Жаттықтырушыларым мен ата-анама рахметімді айтамын. Бұл жеңіске үлкен еңбектің арқасында қол жеткіздік. Командама рахмет. Алға, Қазақстан», – деді боксшы қыз.
Шәріпова-Колева бокс кешінің андеркартында бірнеше қазақ боксшысы өздерінің кезекті кездесулерін өткізді. Екінші орта салмақтағы Айдын Елжанов (4-0, 3 КО) дебюттік кездесуін өткізген отандасымыз Абылайхан Есентаевты (0-1) екінші раундта техникалық нокаутпен ұтты. Ал орта салмақтағы боксшымыз Тамирлан Райымқұлов (1-0-1, 0 КО) өзбекстандық қарсыласы Степан Партновтан (0-1) басым түсті. Сонымен қатар, жартылай орта салмақтағы Әмірхан Түлеуов (2-2-0) ресейлік қарсыласы Андрей Кременосовты еш қиындықсыз жеңді. А.Кременосов бірінші раундтан кейін жекпе-жекті жалғастырудан бас тартты.
Әли БИТӨРЕ,
«Егемен Қазақстан»
