Көрменің басты тақырыбы «Болашақтың энергиясы» болып табылады, яғни баламалы энергия көздерін дамытуды ұсынады. Энергетикадағы сапалы өзгерістер жолы мен оны тасымалдау тәсілдері де осы көрме барысында талқыланып жатыр, дейді Семейдегі №3 мектеп директорының тəрбие жөніндегі орынбасары Əлия Бүркітова. Оның айтуынша, ЭКСПО көрмесі басталған алғашқы күндері "Барика" фирмасы арқылы 38 оқушы барып келсе, тамыз айының соңында аз қамтылған, көп балалы отбасынан шыққан 45 оқушы тағы да сапар шегіпті.
-Оқушыларға Елордамызда өтіп жатқан әлемдік деңгейдегі шара ерекше әсер етіп отыр,-деді Әлия Мейрамғалиқызы,-олар енді химия, физика, биология сияқты жаратылыстану пәндерін қызығушылықпен оқимыз дейді. ЭКСПО көрмесін өткізу кезінде Қазақстанның Астанасында әлемнің түкпір-түкпірінен келген түрлі мәдени ұйымдар өздерінің концерттік бағдарламаларын, ұлттық күндерін және өзге де маңызды іс-шараларын ұсынды. Бір сөзбен айтқанда балалар әрі рухани әрі мәдени тәлім-тәрбие алды.
Раушан Нұғманбекова
Семей
Cуреттер автордыкі
