Қазақстан ұлттық құрамасының спортшылары спорттың 14 түрі бойынша ел намысын қорғады. Биылғы Жазғы Универсиаданың қорытындысы бойынша, 120-ға жуық спортшымыз 3 алтын, 6 күміс және 7 қола жүлде иеленді. Жалпыкомандалық есепте біздің студенттер 16 медальмен 21-ші орынға тұрақтады. Сондай-ақ, Қазақстан құрамасымен бірдей медаль жинаған Түркия құрамасы 20-шы орынға жайғасқан. Түріктер бізден күміс жүлде есебі бойынша алға шыққан. Бұл сында Жапония құрамасы бірінші болды. Күншығыс елі студенттерінің еншісінде 101 медаль бар (37 алтын, 27 күміс және 37 қола). Оңтүстік Корея спортшылары 82 жүлдемен (30, 22, 30) екінші орында тұр. Ал жарыстың соңғы күнінде Ресей құрамасын медаль бойынша басып озған Тайвань спортшыларының қоржынында 90 медаль бар (26, 34, 30).
Осыдан екі жыл бұрын Оңтүстік Кореяның Кванджу қаласында өткен XXVIII Жазғы Универсиада ойындарында қазақ спортшылары 10 медаль иеленіп, жалпыкомандалық есепте 11-ші орыннан көрінген болатын. Сол жылы студент спортшыларымыз 6 алтын мен 4 қоланы құрама қоржынына салған еді. Ал бірінші орынды Оңтүстік Корея спортшылары 108 медальмен (47 алтын, 32 күміс және 29 қола) иеленген-ді.
Екі жыл сайын тұрақты түрде ұйымдастырылып тұратын студенттердің келесі универсиадасы 2019 жылы Италияның Неаполь қаласында өтеді.
Әли БИТӨРЕ,
«Егемен Қазақстан»