Айттық дастарxаннан бес мыңға жуық адам дәм татты. Шараның мақсаты - асыл дініміздің құндылығын арттырып, қазақ халқының дархандығы мен мәдениетін паш ету.
Шарада сөз алған Оңтүстік Қазақстан облысы әкімінің орынбасары Ұласбек Сәдібеков барша астаналыктарды Құрбан айт мейрамымен құттықтады.
«Өздеріңізге мәлім, 2017 жылғы 29 тамыз – 3 қыркүйек аралығында «ЭКСПО-2017» халықаралық мамандандырылған көрмесі аясында Астана қаласында Оңтүстік Қазақстан облысының күндері өтуде. Құрбан айт – адамдардың бір-біріне қайырым жасауына ұйытқы болатын ерекше діни мереке. Қасиетті Құрбан айтта ынтымақ пен бірлігімізді, өзара татулығымызды арттыру мақсатында облыс басшысы атынан астаналықтарға және Елорда қонақтарына арнайы дастархан жайып ас таратылып отыр», – деді Ұласбек Сәдібекұлы.
Шара барысында Құрбан айт мерекесіне орай бір ірі қара мен екі қой құрбандыққа шалынып, 1 тонна бауырсақ пісірілді. Қала тұрғындары мен қонақтарына Төлеби ауданының қымызы мен Отырар ауданының шұбаты ұсынылды. Сондай-ақ келушілерге оңтүстіктің тәттілігі тіл үйірер жеміс-жидектері мен қауын-қарбызы тегін үлестірілді.
Облыстың мәдени, тарихи келбетін айқындайтын 2000-ға жуық құнды жәдігер мен қылқалам және қолөнер шеберлерінің туындылары да Астана халқы мен ЭКСПО қонақтары назарына ұсынылды. Соның ішінде қазақ тарихында орны айырықша Кенесары Қасымұлының қылышы да бар.
Этно ауылдағы ұлық мерекенің көркін Оңтүстік Қазақстан облыстық филармониясының әншілері қыздыра түсті. Күміс көмей, жез таңдай әншілер кйіз үйлерді аралай жүріп, қазақтың дәстүрлі әндерін нақышына келтіріп орындап, көпшіліктің ықыласына бөленді.
