Тұңғыш Президентіміздің көреген саясатының арқасында еліміздегі аса зор өмірлік мәні бар тіл саясатының күрделі де, нәзік мәселелері, әрқашанда мемлекеттік тұрғыдан үйлесімді шешімін тауып келеді. Қазақ қоғамының саналық жаңғыру кезеңінде қазақ тілін іштей түлетіп, жаңа деңгейге көтеру мақсатында, қазақ жазуының латын графикасына негізделген жаңа нұсқасын жасау жөніндегі бастаманы қоғамдық орта, әсіресе жастар қауымы дер кезінде көтерілген, маңызды мемлекеттік деңгейдегі мәселе деп қабылдап отыр.
Сөз жоқ, ғаламдық дамудың жаңа дәуірінде латын әліпбиіне көшу мәселесі тарихи қажеттілік болып табылады және тіл саясатында халықаралық ақпараттық-коммуникациялық құралдарды пайдалану бүкіләлемдік трендтер талабына толық сәйкес келеді. Қазір дүние жүзіндегі аса өзекті ақпараттар ағынының 70 пайызы латын графикасымен беріледі. Әлемдегі барлық IT сала өздерінің бағдарламалар базасы мен техникалық шешімдерін латын таңбасында жасайды. Біздің жастардың латыншаға әлдеқашан бауыр басып алғанын атап айтқан жөн, қазір Қазақстан жастары гаджеттерді белсенді қолданады, еліміздің басым бөлігі латын әліпбиін жақсы меңгерген. Демек, қазақ тілін латын қарпіне көшіру бүгінгі өмірдің шынайы талабы болып табылады. Ол, ана тіліміздің әлемдік өркениет кеңістігіне сәтті қосылуына, оның жаңа геосаяси әлемдегі қарым-қатынастық мәртебесінің артуы мен ғылыми-техникалық прогрестің қалың ортасында болуына мүмкіндік туғызады.
Латын әліпбиіндегі қазақ жазуын қалыптастыру – ұлттық сананы азат етіп, жаңғыртуға аса үлкен қозғау салатын, қазақстандық бірегейлік пен ұлттық бірлікті одан әрі нығайтуға ықпал ететін маңызды қадам.
Біз латын графикасына негізделген жаңа әліпбидің ұлтымыздың ғаламдық бәсекелестіктегі әлеуетін арттырып, Қазақстанның жаңа тарихында Елбасы бастамаларының әлденеше рет өз шешімін тапқанындай толық іске асатынына сенімдіміз.
Бұл – мәні зор реформа
Бүгінде Қазақстан даңғыл жолдың басында, анығырақ айтқанда, біздер оқиғаның нақ ортасында тұрмыз. ЭКСПО-2017 халықаралық көрмесі аяқталды. Ислам Ынтымақтастығы Ұйымының Ғылым мен технология бойынша саммиті өтті. Мұның бәрі Қазақстанның әлем алаңында беделі зор ойыншы екенін көрсетті.
Үстіміздегі жылдың басты оқиғасы ретінде Президенттің «Болашаққа бағдар: рухани жаңғыру» атты бағдарламалық мақаласы болды. Мұнда қозғалған мәселелердің маңыздылығын бір ауыз сөзбен жеткізу қиын. Бір ғана «Туған жер» бағдарламасының өзі көп нәрсені аңғартады.
Осындай маңызды мәселелердің бірі болып қазақ тілінің латын қарпіне біртіндеп ауысу жолы дер едік. Әрине, бүгінгі таңда әлемде латын әліпбиі кеңінен қолданылады. Бұл – өмір шындығы.
Ал егер біз әлеуметтік желілерге назар аударсақ, онда жастардың қазақ тілін жеткізу үшін әлдеқашан латын әріптерін пайдаланатынын көреміз. Сонымен қатар Елбасы атап өткендей, латын графикасына ауысу кириллицадан түпкілікті арылу болып табылмайды. Ол тек қазақ тіліне ғана қатысты болмақ.
Бұл мәні зор реформа елдің қауіпсіздігін арттырып, бәсекелестігін күшейтуге, Қазақстанға әлемдік ақпараттық кеңістіктен лайықты орын алуға даңғыл жол ашады.
Белла ГАЗДИЕВА,
«Родина» ауылдық округінің әкімі
(Ақмола облысы)
