Өңірлердің өркені өсіп, өрісі кеңейген сайын ел экономикасының әлеуеті де соғұрлым тұғырлана түсетіні де ешқандай талас туғызбайды. Осындай жетістіктерге куә болу Елбасы үшін де, ел үшін де үлкен мерей екені анық. Осы тұрғыда республика Президенті Нұрсұлтан Назарбаевтың еліміздегі өндірісі өркен жайған өңірлердің бірі – Ақтөбеге арнайы келуі арайлы аймақтың жұртшылығын бір серпілтіп тастады.
Мемлекет басшысы мұнда ең алдымен «Казхром» трансұлттық компаниясы» АҚ-тың бүгінгі тыныс-тіршілігімен танысты. «Казхром» дегенде осы іргелі кәсіпорынның құрамындағы Ақтөбе ферроқорытпа зауытының № 4 цехы қоса аталады. Аталған компанияның бас директоры Мемлекет басшысына бұдан үш жыл бұрын пайдалануға берілген еліміздегі ірі кәсіпорынның қазіргі жай-күйі туралы баяндап берді. Бұдан соң Президент Нұрсұлтан Назарбаев Ақтөбе аймағында орналасқан «Казхром» трансұлттық компаниясының алдағы даму перспективаларына қатысты өз ой-пікірін ортаға сала келіп, нақты тапсырмалар жүктеді.
Жалпы құны 126,4 миллиард теңгені құрайтын елімізде баламасы жоқ өндірістік құрылым аталған трансұлттық компанияның іс-жоспарына сәйкес жүзеге асырылған. Осы жобаға сәйкес елімізде жоғары сутегілік өндірістің көлемін одан әрі ұлғайту шаралары көзделген. Осыған орай №4 цехтағы балқыту үдерісінің көлемі өсіп, тағы да қосымша 4 пеш орнатылған. Өндірістегі мұндай өзгерістер өлшемі жаңаша сипаттағы ток тартылысы жылына 440 мың жоғары сутегілік феррохром өндірісін қамтамасыз етуге мүмкіндік бере алады. Алайда мұның өзі табыс шегі болмауға тиіс. Сондықтан кәсіпорынның негізгі тұтынушылары мен экспорт көлемін одан әрі көбейту жолдарын қарастырған жөн деп шегелей тапсырды Мемлекет басшысы. Ендеше бұған дейінгі Қытай Халық Республикасы, Еуропа елдері мен АҚШ мемлекетіне шығарылып келген экспорт көлемі мен географиясы кеңейе түседі деген сөз. Бұдан кейінгі кезекте Президент кортежі Ақтөбе рельс-арқалық зауытына қарай бағыт алды. Мұнда кәсіпорын басшысы Андрей Кузьмин Президентті республиканың индустрияландыру картасындағы ең ірі жобалардың бірімен таныстырды. Кәсіпорын қазіргі күні ТМД мен Еуразиялық экономикалық одақ кеңістігінде ұзындығы 120 метрлік «Р-65» стандартындағы табиғаттың қатаң жағдайларына төзімді термоберік темір жол рельстерін шығарады. Мұнда зауыттың толық жобалық қуатына көшу уақыты алдағы 2018 жылдың аяғына белгіленген. Сол кезде жылына 430 мың тонна прокат шығаруға мүмкіндік туады. Жүрдек темір жол көліктеріне арналып шығарылған темір жол рельстері өзі тектес өнімдермен салыстырғанда термоберіктік қуатымен ерекшеленеді. Биылғы жылдың 9 айында зауыт конвейерінен 116,4 мың тонна рельс өнімдері өндірілді. Оның жалпы құны 31,2 млрд теңгені құрайды. Бүгінгі күні «Ақтөбе рельс-арқалық зауыты» ЖШС-нің басты тұтынушылары Орталық Азия республикалары болып табылады. Ең соңғы үлгідегі заманауи технологиямен жарақтандырылған зауыт Елбасының оң бағасын алды. Зауыттағы жаңашылдық көріністері бәсекелестікке қабілетті өнімдер өндіруге мүмкіндік беретіні де Президент назарына ілікті. Аталған зауыт индустрияландырудың алғашқы бесжылдығы аясында елімізде жүзеге асырылған бірегей жоба. Бүгінгі күні зауыт өнімдері экспортқа жол тарта бастады. Бұған қатысты алынған арнайы сертификаттар Ақтөбе рельстері ұлттық және әлемдік стандарттарға сәйкес келетінін көрсетеді.
Аталған отандық кәсіпорын Ресейдің мемлекеттік стандарттарына сәйкес келетінін дәлелдейтін сертификаттарға да қол жеткізген. Мұның өзі зауыт өнімдерінің ауқымын әжептәуір көтеруге септігін тигізген.
Негізінен алғанда Ақтөбе рельс-арқалық зауытының өнімдері «Қазақстан темір жолы» ұлттық компаниясы инвестициялық жобасының қатарына кіреді. Сондықтан да Ақтөбе рельстері еліміздің аумағындағы магистральды темір жолдарға күрделі жөндеулер жүргізуге пайдаланылады. «Жұбановтар әлемі» мұражай-үйінде облыстың зиялы қауым өкілдерімен кездесу сәтінде Елбасы Ақтөбе рельс-арқалық зауыты еліміздегі ең ірі жұмыс беруші кәсіпорын ретінде ерекшеленетінін атап көрсетті.
Қазіргі кезде зауыттың инженер-конструкторлары толық автоматтандыру жүйесін құруға қол жеткізген. Біз мұны бірінші кезекте ақауларды көп болдырмау және күтпеген, кездейсоқ, оқыс жағдайлардың алдын алу үшін құрдық. Қазіргі коэффициенттік жүйе ойдағыдай жұмыс жасап тұр, деді зауыт директоры Мемлекет басшысы Н.Ә.Назарбаевқа.
Іргелі кәсіпорындағы емен-жарқын жүздесулер кезінде Ақтөбе облысының әкімі Б.Сапарбаев Президент Нұрсұлтан Назарбаевқа өңірде индустрияландырудың қазіргі екінші бесжылдығы тұсында қанат қаға бастаған өндірістік жобалар жөнінде айтып берді. Өңір басшысының мәлімдеуінше, бүгінгі күні Индустрияландыру картасына енгізілген 94 жобаның 84-і пайдалануға беріліп үлгерген. Оның жалпы құны 565 миллиард теңгені құрайды. Өңірде жаңа өндіріс орындарының іске қосылуы 7,4 мың тұрақты жұмыс орнының ашылуына септігін тигізді, деді облыс әкімі.
Мемлекет басшысы биылғы жылдың басындағы «Қазақстанның үшінші жаңғыруы: жаһандық бәсекеге қабілеттілік» атты Қазақстан халқына Жолдауында орталық және жергілікті атқарушы органдарға «Нұрлы жер» бағдарламасын іске асыруды тапсырғаны белгілі. Нұрсұлтан Әбішұлы өңірге жұмыс сапары кезінде аталған бағдарламаның ойдағыдай орындалып келе жатқанына көзін жеткізді.
Маңызды жоба бірінші кезекте құрылыс сапасына айрықша мән берілуімен ерекшеленуі тиіс. Осы орайда Елбасы өңірдегі бұл бағдарламаның жай-күйі өзге өңірлерге үлгі-өнеге бола аларлықтай деңгейде екеніне ризашылық танытты. Тұтастай алғанда, облыс орталығының шағын аудандарында 2017-2018 жылдары 423 аз қабатты жаңа тұрғын үйлер бой көтермек. Сол кезде бұл араға кем дегенде 100 мың тұрғын қоныс тебетін болады. Оның негізгі бөлігі биылғы жылдың еншісіне тиеді. Сондай-ақ биыл «Нұрлы жер» бағдарламасына сәйкес мыңнан астам отбасы тұрғын үйлерін жақсарта алатыны да жақсы жетістік. «Нұрлы жер» бағдарламасының өңірлік ерекшелігінің басты бір сипаты әлемдік тұтыну үлгілеріне сәйкес келетін «таунхаус» үлгісіндегі 3-4 қабатты үйлер екенін өңір басшысы Бердібек Сапарбаевтың аузынан естігенде әрі бұл көрініске тікелей өзі куә болған сәтте бұл қолдауға әбден тұрарлық бастама. Еліміздің қарапайым тұрғындарының өмір сүру деңгейін жоғары сатыға көтеруге көмегін тигізе алатын ерекше фактор. Осындай үрдіс еліміздің өзге өңірлеріне де сіңісті болғанын қалаймын, деп өзінің шынайы тілегін білдірді Елбасы.
Тұрғын үй құрылысын салу үшін өңірде қанша адам кезекте тұрғаны да Президент назарынан тыс қалған жоқ. Өңірде олардың саны 130 мың болып шықты. Бұл санаттағы азаматтардың басым бөлігі Тұрғын үй құрылыс жинақ банкінде қажетті қаражаттарын қамдастырған. Оның дені өздерінің төлем қабілеттілігін дәлелдеп үлгерген. «Нұрлы жер» – елімізде тұрғын үй кезегінде тұрған азаматтардың санын азайтудың басты баламалы жолы. Осы орайда бұл бағдарламаның мүмкіндіктерін толық пайдалану үшін бүгінгі күні 130-дан астам құрылыс компаниялары мен құрылыс индустриясы кәсіпорындары біркісідей жұмылған. Материалдардың сексен пайызы жергілікті жерде өндірілетіні де «Нұрлы жер» бағдарламасы аясына кіретін тұрғын үйлердің өзіндік құнын төмендете түскені Елбасының қанағаттанушылық сезімін туғызды.
Облыста тұрғын үй құрылысын салумен қатар, ел-жұртқа қажетті инфрақұрылымдық жүйелер де бір мезгілде қатар орнығып келеді. Қазіргі күні «Нұрлы жер» бағдарламасы аясында тұрғызылған жеке тұрғын үйлер аумағында 1200 орындық орта мектеп пен 300 адамды қамти алатын емхана құрылыстарын мемлекет-жекеменшік әріптестігі аясында салу белгіленген. Республика Президенті Нұрсұлтан Назарбаев аталған бағдарлама аясындағы құрылыс жобаларымен танысып, оның сапасына, сыртқы көрінісі мен ішкі интерьерінің өзара үйлесімділігіне қанағаттанғандық танытты.
Инфрақұрылым дегенде жаңа тұрғын үйлерге тартылған «көгілдір отынның» тұрғындарға тигізетін әлеуметтік-тұрмыстық жеңілдіктерінің орны айрықша. Мұндай жағдайда өмір сүру сапасы одан әрі арта бермек. Мұндай игі мақсатқа қол жеткізу үшін Ақтөбе аймағында газбен жабдықтау ісінің кешенді шаралары іске асып келеді. Облыс орталығының іргесінде тұрғызылған «АГРС 300» автоматтандырылған газ тарату стансасына жүктелетін әлеуметтік-тұрмыстық салмақ пен жауапкершілік осындай. Аталған станса Елбасының осы сапарында іске қосылды. Жалпы соңғы екі жылда өңірді газбен қамту деңгейі 60-тан 80 пайызға дейін өскен.
Мемлекет басшысы Нұрсұлтан Назарбаевтың «Болашаққа бағдар: рухани жаңғыру» атты мақаласы еліміздің тұтастай рухани жаңғыруы жөніндегі кең ауқымды бағдарламасын белгілеп берген қабырғалы құжатқа айналғаны белгілі. Президент өңірге жұмыс сапарының екінші бөлігін облыста осы мәселелерге байланысты белгіленген іс-шаралар кешенімен танысудан бастады. Атап айтқанда, бұл бағыттағы болашаққа бағдар деген басты тармақ келешек ұрпақтың рухани тұрғыдан жан-жақты үйлесімді дамуы деген ұғымды білдіре алады. Осы тұрғыда Ақтөбе аймағында қазірдің өзінде іргелі қадамдар жасалып үлгергені болашаққа белгіленген бағдар байыпты екенін білдіреді.
Айталық, еркін елдің ертеңгі қамын көздей отырып тұрғызылған өңірдегі арнайы нысандар өскелең рухани сұраныстарды толықтай өтеу деңгейіне көтеріле білген. Сонымен бірге сәні мен салтанаты келіскен ғимараттар Ақтөбе қаласының архитектуралық ажарын аша түскені атар таңдай ақиқат. Солардың қатарында өнер орталығы және шығармашылық академия ғимараттары бар. Егер шығармашылық академия ғимараты туралы айтсақ, бұл айрықша нысанның жобалық қуаты бір мезгілде 1000 адамды қабылдауға лайықталған. Академияның іске қосылуы 6-18 жас аралығындағы жеткіншектерді қосымша тәрбие беру тетіктерімен қамти алады.
Ғимараттағы күмбезді аспаны бар планетарий республика өңірлерінің бірде-бірінде кездеспейді. Оған келушілер күн жүйесіндегі барлық планеталарды тамашалай алады. Академия төбесінде орнатылған телескоп пен обсерваторияның да орны айрықша. Мұндай жоба келешек ұрпақ өкілдерінің жан-жақты өсіп-дамуына айта қаларлықтай алғышарт қалай алатыны және Президенттің болашаққа бағдар беретін кең ауқымды бағдарламасымен үндестік таба алғаны Елбасының Ақтөбе облысына сапарының басты бір құндылығы іспеттес.
Рухани жаңғыру ісінің тағы бір тұғыры – ұлттық өнеріміз бен мәдениетімізге деген мемлекеттік тұрғыдағы шынайы жанашырлық. Республика өңірлерінде тұтастай ұлт өнерінің өрістеуіне сүбелі үлес қосқан халқымыздың небір таңдаулы да талантты ұлдары мен қыздары дүниеге келген. Осы орайда Ақтөбе аймағы қазақ музыка өнерінің қайталанбас тұлғалары әкелі-балалы Ахмет Жұбанов пен Ғазиза Жұбанова туып-өскен текті топырақ екені де көпшілікке жақсы мәлім.
Өзінің мақтан тұтар ұл-қыздарының өшпес рухтарын асқақтату мақсатында Ақтөбеде биыл «Жұбановтар әлемі»
атауын иеленген тамаша мұражай-үй бой көтерді. Ақтөбе облысына жұмыс сапары барысында республика Президенті Нұрсұлтан Назарбаевтың осынау қастер тұтар ғимаратқа арнайы барып бас сұғуы тұтастай ұлт өнері мен мәдениетіне деген құрмет пен тағзым белгісіндей әсер қалдырды.
«Сылдырап өңкей келісім, тас бұлақтың суындай» деп данышпан Абай айтқандай, мұражай-үйде түр мен мазмұнның өзара келісім таба білуі жоба жетекшілерінің терең пайымы мен парасатын танытқандай. Мұнда аталған тұлғалардың мәдени мұраларын келешек ұрпақтың бойлары мен сана-сезімдеріне сіңіруге басымдық берілген. Сондай-ақ «бұлақ көрсең – көзін аш» дегендей, өнерді пір тұтқан бұл мекенде дарынды балалар мен жеткіншектердің тұла бойында тығылып жатқан талант ұшқынының шоғын үрлеу жолдары да қоса қарастырылған. Сонымен бірге халықтық шығармашылық ұжымдар қызметінің өрістеуіне де жан-жақты жағдайлар жасалған. Әрі мұражай-үйі шығармашылық бағыттағы әртүрлі авторлық кештер мен кездесулер және концерттер өткізуге де өте ыңғайлы.
Республика Президенті Нұрсұлтан Назарбаев өнер орталығы мен шығармашылық академия ғимараттарында өңірдегі шығармашылық иелерімен, зиялы қауым өкілдерімен кездесті. Мысалы, өнер орталығында өткізілген кездесу кезінде өнердің өз өкілі Света Айтбаева облыс орталығында 1200 адамдық зәулім де еңселі өнер ордасының бой көтеруіне шапағатын тигізгені үшін Елбасына шынайы алғыс сезімін білдірді. Өйткені бұған дейін Ақтөбе қаласындағы концерт залдары – 400, әрі кеткенде 500 адамға ғана есептеліп келіпті.
Сондай-ақ Елбасы «Жұбановтар әлемі» мұражай-үйінде болған кездесуде заманның бүгінгі биік талабы мен талғамына және өлшеусіз биік өзгерістеріне сай өмір сүре білу жөнінде орамды ой сабақтады. Бұл ретте адам факторының елеулі рөл атқара алатыны туралы жүректерге жеткізе айтты.
Елімізде жүзеге асып жатқан игілікті істердің бәрі қазақстандықтардың өмір сапасын одан әрі көтеру үшін жасалуда. Мемлекетіміздегі ортақ табыстардың тасқындай түсуіне ақтөбеліктердің қосып отырған үлестері де қомақты. Мен бұған бүгінгі сапар барысында көз жеткізе түстім. Ақтөбенің ертеңі еңселі, болашағы асқақ. Келешекте Ақтөбе қаласы елордамыз – Астана, мегаполис қала – Алматы және республикамыздың оңтүстігіндегі Шымкент секілді еліміздегі ірі шаһарлардың қатарынан орын алатын болады. Бүгінгі іргелі істердің бәрі осы мақсатқа жұмылдырылған өңірде ел ырысын еселей түсетіндей ілкімді істер мен өрелі өзгерістер мол бола берсін, деп түйін жасады облысқа сапарының қорытындысында Мемлекет басшысы Нұрсұлтан Назарбаев.
Темір ҚҰСАЙЫН,
«Егемен Қазақстан»
Ақтөбе облысы
Суреттер Президенттің баспасөз қызметінен алынды