Ең бастысы, біз ХХІ ғасыр балаларына заманға сай білім беруге бет алдық. Әр адам заманға сай табысты да білімді болу үшін қандай дағдыларды меңгеруі керек? Әрине, әр халық ең бірінші өз тілін жетік білуі керек, еліміздегі халықтар достығын нығайтатын орыс тілін және халықаралық ағылшын тілін білу маңызды.
Қазіргі таңда жаңарған білім беру бағдарламасында осы үш тіл де жаңа жолға қойылғандығын ата-аналар мен ұстаздар жақсы қабылдады. Үкімет тарапынан үш тілді білім беруді ұйымдастыру мақсатында қаржы бөлініп, ұстаздарға қосымша ағылшын тілі үйретілуде.
Болашақта жоғары деңгейдегі білікті мамандарға сұраныс артатыны белгілі екенін ұстаздар жақсы түсініп, білім жетілдіруге ұмтылуда. Өз кәсібінің шеберлері көбейгенде ғана еліміз тезірек дами түсері анық. Әр маман өзіндік ерекшелігі бар шешім қабылдауды меңгере білсе, оған ұжымы да, отбасы мүшелері де түсіністік танытса, еліміздегі білім деңгейімен бірге экономикалық көрсеткішіміздің де жоғарылай түсетіні белгілі.
Әлбетте, жаңартылған білім бағдарламасына көшу оңай шаруа емес. Дегенмен ұстаздар қосымша курстарды оқып, барынша алға ұмтыла түсуде. Әдістемені өзгерту, оқулықтарды қайта шығару оңай емесі түсінікті. Әр қолға алынған істің бастапқы кезеңінде қиыншылықтар, қателіктер болуы заңдылық. Тек дер шағында бір жағадан бас, бір жеңнен қол шығарып, болашаққа сеніммен қарап, заманға сай болу үшін бірлесе еңбектенгенде ғана үлкен нәтижелерге қол жеткізетініміз анық.
Әрине, бар білгенін балалардың бойына сіңіріп, білім нәрін егіп жүрген ұстаз жұмысының жеңіл емесі белгілі. Соған қарамастан ел болашағы үшін бар ынтасымен жаңалық атаулыны жылдам қабылдап үлгеретін ұстаздар қауымы – қоғамды алға сүйреуге атсалысып отырған үлкен күш. Өзім басшылық ететін білім ұясындағы, яғни Шәкәрім Құдайбердіұлы атындағы №190 жалпы білім беру мектебінде еңбек етіп жүрген бастауыш сынып мұғалімдері Эльвира Ан, Келбет Үмбеталиева сынды жас ұстаздар биылдан бастап енгізіліп жатқан жаңа бағдарлама ерекшеліктері мен оқу-құрал әдістемелерінің өздеріне де, оқушыларға да өте қолайлы екенін айтып, өз өтініштерімен биыл да бірінші және екінші сыныптарға қуана дәріс беріп жүргенін айтқым келеді. Еңбегінің жемісті болуы үшін жан-тәнімен құлшына жұмыс істейтін маманның кімді де болса қуантатыны анық. Әсіресе, мұғалімдік мамандықта мұндай қасиеттің бірден байқалып, ата-аналар тарапынан да, балалар тарапынан да разылыққа бөленетіні рас. Жаңа бағдарламаға түсінбестік танытқан ата-аналар да кездесетінін жасырмаймыз. Оларға семинар, жиналыс және жеке дидарласу арқылы жаңа бағдарламаның артықшылықтарын түсіндірудеміз.
Жаңартылған оқу бағдарламасы мұғалім шығармашылығына еркіндік бере отырып, шынайы өмірмен байланысты түзілгенін атап өту керек. Оқу барысында ұстаз да, оқушы да басты рөл атқарып, ұстаз оқушыны өз бетінше көп ізденіп, көбірек мәлімет жинауға ынталандыратыны қуантады.
Білім алушылардың оқу жетістіктерін бағалауда да үлкен ерекшелік бар. Жасырары жоқ, бастапқы кезде критерий бойынша бағалау және жиынтық бағалауда қамту ісінде біраз түсінбеушілікке тап болғанымыз рас. Дегенмен, «Өрлеу» БАҰО АҚФ және Педагогикалық шеберлік орталығының ұйымдастырған білім көтеру курстарының арқасында бұл мәселе де шешімін тапты.
Оқушы үшін әр сабақ білім әлеміне саяхатқа шыққандай әсер қалдыруы тиіс екенін түсіне білген мұғалім жұмысының нәтижесі жаман болмайтыны анық. «Бес саусақ бірдей болмайды» демекші, бағдарламаны толық меңгере алмайтын оқушылармен қосымша жұмыс істеу де жаңа бағдарламада қарастырылған.
Сәбила ЕҢСЕПБАЕВА,
Шәкәрім Құдайбердіұлы атындағы
№190 жалпы білім беру мектебінің директоры,
Қазақстан білім беру ісінің құрметті қызметкері
АЛМАТЫ
