Қазақстан • 13 Қазан, 2017

Жол сапасын жақсартудың жаңа жүйесі

428 рет
көрсетілді
3 мин
оқу үшін

Елімізде жол сапасын жақсартатын заманауи технология сынақтан өткізілуде. Осыған сәйкес Алматы облысы Райымбек ауданында резеңке-асфальт-бетон қоспасы тәжірибе ретінде жолға төселді. Сынақ ретінде жасалған жолдың ұзындығы 500 метр, ені 8 метр. Резеңке-асфальт-бетон қоспасынан тұратын өнімді қазақстандық жол ғылыми зерттеу институты қолдануда.  

 

Жол сапасын жақсартудың жаңа жүйесі

Аталған технология жолдар­дың сапалы әрі қауіпсіз болуы­на мүмкіндік береді. Осыған дейін қыркүйектің бас кезінде ғылыми-зерттеу жұмысы аясында дәл осындай сынақ түріндегі жол, «Көкшетау-Кішкенекөл» учаскесіне төселген.

Мамандар резеңке-асфальт-бетон қоспасына тәжірибе жасамас бұрын жол қабаттарына зертханалық сынақ жүргізілгенін айтты. Алғашқы зерттеу нәти­жесі бойынша асфальт құрамы айтарлықтай берік болатыны анықталған. Атап айтқанда жолда жарық-сызаттар пайда бол­май­­ды, су өткізбейді, тығыз әрі авто­­­көлік дөңгелектеріне де жай­­­лы. Тежеуіш басқанда жыл­­дам­­­дық­ты азайту оңтайлы болады.

– Резеңке үгінділерін жол биту­мына араластырғанда біте қай­насып, құрамы күшейе түсе­ді. Аталған технология АҚШ пен Еуропаның бірқатар мем­лекеттерінде және Азия ел­дерін­де кеңінен қолданылады. Әсі­ресе шұрық-тесік жолдарды жамай беруге қыруар қаражат жібермей осы материалды пайдаға асыру аса тиімді, – дейді «Өндірушілердің кеңейтілген міндеттемелері операторы» ЖШС өкілі Жомарт Рақымжан.

Аталған ғылыми-зерттеу жұ­мы­сының қорытындысы 2018 жылдың бірінші жартысында шығарылады. Ал келер жылдың қараша айында зертханалық зерттеудің техникалық шеші­мі негізінде сынамадан өткен салалық нормативтік-техни­калық құжат жасалады. Осы­лайша, 2019 жылдан бастап резең­ке-асфальт-бетон қоспасы өндіріске енгізілуі әбден мүмкін.

Мамандардың айтуынша резеңке-асфальт-бетон қоспа­сын кәдеге жарату сонымен қатар маңызды экологиялық проблемаларды да шешуге мүмкіндік беретін көрінеді. Яғни осы арқы­лы шашылып жатқан шина қалдық­тары іске асады. Ресми ақпа­рат бойынша елімізде жыл сайын 80 мың тоннаға жуық авто­көлік шиналары жинақталады. Қазіргі уақытта соның небары 20%-ы ғана қайта өңдеуден өтеді.

Еске салсақ, 2016 жылдың тамыз айынан бастап елімізде ескі шиналарды жинайтын, тасымалдап өңдейтін кәсіпорындарға төлем жасау тетігі енгізілген болатын. Аталған жүйе негізінде 2016 жылы Қазақстанда 14,5 мың тонна шина өңделген. 2017 жылы өңдеуші кәсіпорындар шина қалдықтарын жинауды, қайта өңдеуді 2019 жылға дейін 70 мың тоннаға жеткізу жөнінде ӨКМ операторымен ұзақ мерзімді келісімге отырған. Сонымен қатар шина қалдықтарын жинау және қайта өңдеу саласын дамыту негізінде жаңа жұмыс орындарын ашу аса маңызды. Бүгінгі күнде осы салада 400-ден астам адам қызмет атқаруда. Ендеше экологиялық зияны жоқ, стандарттарға сай тың жоба жан-жақты мақұлданып іске асып жатса құба-құп.

 

Арман ОКТЯБРЬ,

«Егемен Қазақстан»

 АЛМАТЫ