Сондай хаттың бірін Жапонияның Аичи префектурасының тұрғыны, «ЭКСПО-әже» атанған Томийо Ямада жолдаған.
Хат иесі: «Мен 2005 жылы Аичи-ЭКСПО көрмесінде алғаш рет Қазақстан павильонын аралап көріп, Сіздің еліңіз жайлы көп нәрсеге қанықтым. Содан бері Қазақстанға келуді армандадым. 2008 жылы Испанияның Сарагоса қаласында өткен ЭКСПО көрмесінде де сіздердің ұлттық павильондарыңызда болдым», деп жазған.
Томийо Ямада биыл ЭКСПО-2017 көрмесінің елшісі атанғанын, Қазақстанға келіп, көптен күткен арманы орындалғанын баяндаған.
Осы орайда ол: «Көрмеге екі рет бардым. Қазақстанның ұлттық музейі мен қаладағы орталық саябақты, Тұңғыш Президент музейін аралап көрдім. Сіздің өз еліңізге деген қамқорлығыңызды сезіне алдым», деп атап өткен.
Автор Астанадан және ЭКСПО-2017 көрмесінен жақсы әсер алғанын айтып, ғылыми жаңалықтардың адамзаттың жарқын болашағы үшін пайдаланылатынына сенім білдірген.
Хат соңында Томийо Ямада Нұрсұлтан Назарбаевқа көрменің жоғары деңгейде ұйымдастырылғаны үшін алғыс айтқан.
