Байқауға Қарулы Күштер түрлері, әскер тектері, өңірлік қолбасшылық әскерлері, бас басқармалар мен әскери оқу орындары ауқымында өткізілген байқаулардың жеңімпаз сержанттары (старшиналары) тартылды.
Бұдан бұрын өткізілген байқаулардан бұл шараның басты ерекшелігі Бүкіларамиялық байқау тарихында алғаш рет өзге мемлекеттік ведомстволардың өкілдері қатысты. Сонымен Мемлекеттік күзет қызметінің намысын 6 сержант қорғап, ал Ұлттық ұланның абройын 4 бақылаушы асқақтатты.
Жалпы, байқауға еліміздің түкпір-түкіпірінен 16 командадан құралған 75 сержант қатысып, алты аталым бойынша үздіктер анықталды. Атап айтқанда, олар:«Қарулы Күштер түрі мен әскер тегінің, өңірлік қолбасшылықтың «үздік сержанты», «үздік бригада сержанты», «үздік батальон сержанты», «үздік рота сержанты», «үздік взвод сержанты» және «үздік бөлімше сержанты» (танк, жауынгерлік машина, есептоп, қондырғы).
Шараға бас штабтың тағайындаған арнайы комиссиясы төрелік жасап, әділетті шешімдер қабылданды. Соның нәтижесінде, «Үздік өңірлік қолбасшылық сержанты» аталымында «Шығыс» өңірлік қолбасшылығының сержанты штаб-сержант Ғалымжан Тәукебаев жеңіс тұғырынан көрінсе, «Үздік бригада сержанты» 14776 әскери бөлімінің сержанты 2-сыныпты сержант Жанат Бешалин, «Үздік батальон (дивизион) сержанты» 35748 әскери бөлімінің 3-сыныпты сержанты Мақсат Жақсыбек, «Үздік рота сержанты» атағын 75488 әскери бөлімі ротасының аға сержанты Самат Абайұлы, «Үздік взвод сержанты» атағын 41433 әскери бөлімінің взвод сержанты Ермек Зайлаги және «Үздік бөлімше командирі» атағын 44736 әскери бөлімінің бөлімше командирі сержант Арнат Нәметов иемденді.
Ал командалық есепте бірінші орынды «Оңтүстік» өңірлік қолбасшылығының сержанттары, екінші орынды «Шығыс» өңірлік қолбасшылығының сержанттары және үшінші орынды Десанттық-шабуылдау әскерлерінің сержанттары еншіледі.
Ұйымдастырушылардың айтуынша, байқаудың жыл сайын дәстүрлі түрде өткізілуі сержанттар құрамының кәсіби шеберлігін арттыруға ынталандырып, сарбаздардың жауынгерлік рухын оятады. Сондай-ақ өңірлік қолбасшылықтар мен әскер тектерінде сержанттар құрамының дайындық деңгейін бағалауға мүмкіндік береді.
«Егемен-ақпарат»
