Соның ішінде трансшекаралық Қиғаш өзенінің бойында орналасқан ауыл тұрғындарының негізгі кәсіптері балықшылық. Осы ауылдардағы 10 мыңнан астам адамның күн көрісі балық шаруашылығымен байланысты.
Өткен ғасырдың 60-70 жылдары аудан көлеміндегі Қиғаш және Шора өзендерінің арнасын құмнан тазарту, тереңдету жұмыстары жүргізілген. Осындай жұмыстардың нәтижесінде балық аулау көлемі артып, балықшылардың тұрмыстары жақсарған еді. Қазір осы аталған және олардан шығатын басқа да өзендер арналары тайызданған. Осының себебінен теңізден кіретін балық жолдары жабылып, өзендердегі балық түрлері азайып және аулау көлемі кеміп кеткен. Сондықтан өзендердің арналарын тазалап, тереңдету өте маңызды. Бұл өз кезегінде аудандағы балық шаруашылығында жүрген кәсіпкерлік субъектілерінің табыстарына оң әсерін тигізеді. Осы шара салаға инвестициялар тартып, өнімдерді өңдеу ісінің алға дамуына да мол мүмкіндік берер еді және бірнеше ұрпақ бойы нәпақасын балық арқылы айырып келе жатқан балықшылар тұрмысын да жақсартуға да септігін тигізері сөзсіз.
Атырау облыстық әкімшілігі аудандағы балық шаруашылығын дамыту мүмкіндіктерін қарастырып, шаралар белгілеуде. Қиғаш өзені суының көлемін арттыру және гидрологиялық жайын жақсарту мақсатында инвестициялық жоба дайындалған. Оның жалпы құны 5,6 млрд теңге. Жоба 2017 жылғы 31 тамызда мемлекеттік сараптамадан өткен, конкурстық процедуралар да аяқталу үстінде. Осы маңызды жобаны іске асыру үшін республикалық бюджеттен 2018 жылға 3 млрд теңге көлемінде қаржы бөлінуі қарастырылған. Жобаның уақытында және сапалы орындалуы толық қаржыландыруға тікелей байланысты. Әйтпесе басталған жоба іске аспай жарты жолда қалдырылуы да мүмкін. Ондай дүниелер де біздің еліміздің кейбір жерлерінде ұшырасып қалады.
Сондықтан біз Үкімет басшысы Бақытжан Сағынтаевқа депутаттық сауал жолдап, Қиғаш өзенін тереңдету жұмыстарына қажет қаржыны толық көлемде бөліп, оны уақтылы қаржыландыруға байланысты шаралар белгілеуді ұсындық. Бұл сауалды бірнеше әріптестерім де қолдап, өздерінің қолдарын қойды.
Сәрсенбай ЕҢСЕГЕНОВ,
Сенат депутаты
