Медицина • 17 Қараша, 2017

«Өрлеу» - масылдықты жоятын жоба

534 рет
көрсетілді
4 мин
оқу үшін

Жалпы, қоғамды еңбекке жұмыл­дыру арқылы азаматтардың мақсат-мұратына, ал тұтас мемлекеттің даму деңгейін одан сайын жақсартуға болатыны баршаға аян. Яғни әрбір қазақ­стандықтың еңбегін еселей оты­­­рып, тұтыну идеологиясы мен жап­­­­пай масылдықпен күрес, еңбек өнім­ділігі мен еңбек құндылығына баса мән беру маңызды.

«Өрлеу» - масылдықты жоятын жоба

Бұл орайда Елбасының бес институттық реформаны іске асыру бойынша «100 нақты қадам» Ұлт жоспарындағы әлеуметтік көмекті атаулы сипатын күшейте отырып, оңтайландырудың орны ерекше. «Әлеуметтік көмек тек оған шынымен зәру азаматтарға ғана берілетін болады. Кірісі төмен еңбекке қабілетті азаматтарға мемлекеттік атаулы әлеу­меттік көмек тек олардың еңбекке ық­­пал ету және әлеуметтік бейімдеу бағдарламаларына белсенді қатысуы жағдайында ғана берілетін болады», делінген еді. Ұлт жоспарын орындаудың тәжірибелік кезеңі 2016 жылдың 1 қаңтарынан басталғаны мәлім. 

Нақты істерге өңірлердегі тұрғын­дар да куә болып отыр. Мысалы, атау­­­­лы әлеуметтік көмек көрсетудің жаңа тәсілдері «Өрлеу» жобасы аясында сынақтан өткізіле отырып, өзінің тиімділігін көрсетті. 2015 жылы қанатқақты жоба Оңтүстік Қазақстан облысының 4, ал 2016 жылы барлық аудан, қалаларына енгізіліп, 11,1 мың адамға 468,0 млн теңгеге шартты ақ­шалай көмек төленген. 2083 еңбекке жарамды жан жұмыспен қамту шараларымен қамтылды. 2016 жылы «Өрлеу» жобасын іске асыру қорытындысы бойынша республикалық рейтинг жүйесінде облыс 3-орын алса, 2017 жыл­ғы 6 айдың қорытындысында 1-орын алды. Оңтүстік Қазақстан об­­­лыс­тық жұмыспен қамту және әлеу­­меттік бағдарламалар үйлестіру басқармасының басшысы Мұхит Отаршиевтің айтуынша, 2017 жылдың 1 қарашасына 20703 отбасындағы 118879 адамға 7,2 млрд теңгеге шартты ақшалай көмек тағайындалыпты. 24,6 мың еңбекке жарамды азаматтың 23,3 мыңы немесе 95%-ы жұмыспен қамтудың белсенді шараларына қатысып, 84,7% -ы тұрақты жұмыспен қамтылған. «Халыққа «Өрлеу» жо­басының ерекшеліктерін көрсету, әлеуметтік көмек алушылардың санын тиімді түрде төмендету үшін, облыста шартты ақшалай көмектің біржолғы төлемдеріне басымдық берілуде. Шартты ақшалай көмектің біржолғы сомасы жеке қосалқы шаруашылықты дамытуға, жеке кәсіпкерлік қызметті ұйымдастыруға пайдаланылуда. Ағым­дағы жылдың 10 айында «Өрлеу» жобасына қатысушылардың қатарында 1160 адам өз ісін ашып, жеке кәсіпкер ретінде салық органдарына тіркелді», дейді М.Отаршиев. Ал жобаны іске асыру нәтижесінде, шартты ақшалай көмек алушылардың табыстары облыс­та 4,3 есеге артып, орта есеппен айына 1 адамға 24,3 мың теңгені құраған. Әлеуметтік көмек алушылардың қа­та­рында атаулы әлеуметтік көмек алу­шылардың саны 23%, оның ішінде ең­бекке жарамды азаматтардың үлесі 1,3%, 18 жасқа дейінгі балаларға арналған жәрдемақы алушылардың саны 7 % төмендеген.

Келесі жылы 1 қаңтардан бас­тап атаулы әлеуметтік көмектің жа­ңа форматы енгізіле бастайтыны мәлім. Бұл орайда облыста жаңа фор­маттағы атаулы әлеуметтік көмек 296,5 ­мың адамды, оның ішінде 25% шарт­сыз ақшалай көмек және 75% шарт­ты ақшалай көмек көрсетілетіні жоспарланып отыр. Еңбекке жарамды 44 мыңнан астам адамды жұмыспен қамту бойынша белсенді жұмыстар жүргізілмек. Сондай-ақ әлеуметтік көмектің жаңа форматына ауыртпалықсыз өту үшін тиісті шаралар атқарылуда. Яғни семинарлар өткізіліп, ақпараттық түсіндіру жұмыстары жүргізілуде. 

Ғалымжан ЕЛШІБАЙ,
«Егемен Қазақстан»