Айтулы шараның «әдеби-сазды» деп аталуы да тегін емес. «Қазақстан» концерт залының зәулім әрі кең фойесіне кітапхана ұжымы «Рухани жаңғыру» бағдарламасымен үндес оқулықтардың көрмесін өткізді. Отандық әрі әлемге танымал ақындар мен жазушылардың үздік туындыларымен бірге, жиналған қауым өткен ғасырдың 30-40 жылдарында латын әліпбиінде жарыққа шыққан кітаптармен танысуға мүмкіндік алды. Ұйымдастырушылардың айтуынша, салтанатты думанның басты мақсаты – жастарды мәдениет пен өнерге баули отырып, мәдени жетістіктерді паш ету.
Елімізде бірінші рет өткен әдеби-сазды кеш туралы айта келе Үмітхан Мұңалбаева шараға дайындықтың қызу жүргенін атап өтті. «Біз жұмыстан кейін арнайы жиналып, дайындық жұмыстарын жүргіздік. Сондықтан осынау лирикалық кешті ұйымдастырып отырмыз. Әлеуметтік желі арқылы барлық Астана тұрғындары мен меймандары шақырылды. Менің ойымша, біздің мәдениет қызметкерлері бір сәтке тынығып, кеште көңіл көтеруге лайықты», дейді.
Әдеби-сазды кеште елордамыздың өнерлі жастары би билеп, өлең оқып, сахналық қойылымдар қойды. Жас өнерпаздарды бір-бірімен таныстырып, жақындастыру мақсаты іске асқандай болды. Кештен көңілді қайтқан қала тұрғындары үйлеріне қайтып бара жатқанда, Астана аспанын әлі өлең тербеп тұрған болатын.
Бағашар ТҰРСЫНБАЙҰЛЫ,
«Егемен Қазақстан»
Суретті түсірген
Ерлан ОМАР,
«Егемен Қазақстан»
