Айнаш ЕСАЛИ,
«Егемен Қазақстан»
Бірден айта кеткен жөн, «Қорғас» халықаралық орталығына тұрмысы байланғандардың барлығы да үлкен өзгерістер күтіп отыр. Өйткені «Қорғасқа» арнаулы экономикалық аймақ мәртебесі берілді, бұл халықаралық орталықтың дамуына үлкен серпін береді деп күтілуде. Осыған байланысты «Қорғас» ШЫХО қызметіне қатысты кодекстер мен заңдарға сәйкесінше оншақты түзету енуі тиіс.
Осы өзгерістер алдында Жаркент қаласынан 36 шақырым жердегі «Қорғасқа» журналистік сапармен келдік. Соңғы уақытта халықаралық орталықтың «Қазақстан жағы құлазып жатыр, Қытай тарабы өркендеп кеткен» дейтін сөздер көбейіп кеткені белгілі. Үлкен тауар айналымы бар жерде заңдарды, кедендік бақылау мен тыйымдарды айналып өтіп, бірден жапырып пайда тапқысы келетіндер табылмай тұрмайды. Кейбірі қағаз жүзінде болғанымен, қазақи нақыштағы келбеті көз тартатын бірқатар құрылыстарда қимыл бар екенін сөзбен емес, көзбен көру үшін де келген бұл сапарымыз өзін өзі ақтады.
Біріншіден, «Қорғас» шекара маңы ынтымақтастығы халықаралық орталығына басшылыққа келгеніне бір жылдай ғана болған Қаһарман Джазинмен тікелей жүздесіп, нақты істер мен түйткілді сауалдарға жауаптар алдық. Құрылысы біткен және бітпеген нысандарды араладық.
Оқырман үшін түсінікті болсын, «Қорғастағы» Қазақстанға тиесілі 460 гектар жердегі сауда-саттық кешендері, қонақүйлер мен емдеу-сауықтыру орталығын, Қолөнершілер қалашығын жеке инвесторлардың қаражатына тұрғызу әу бастан қарастырылған. Егер Қазақстан жағы жобаны еңсеруде кешеуілдеп жатса, оның да өз себептері бар. Өйткені Қ.Джазин біздің ортақ орталыққа мүлде басқа дайындық, басқа «стартпен» келгенімізді айтады.
«Қорғасқа арнаулы экономикалық аймақ мәртебесінің берілуі қазақстандық бөлікке инвестиция тартуға және кәсіпкерлердің қызметін дамытуға жайлы жағдай туғызады. Алдағы уақытта «Қорғас» ШЫХО арнаулы экономикалық аймағына қатысушылар салықтың барлық түрінен – жер, мүлік салығы, ұжымдық табыс салығынан босатылады. Бірақ біз әлеуметтік салықтарды төлеу парыз деп ойлаймыз. Өйткені мұнда қызмет істеп жүргендер де, жұмысшылар да, сауда-саттықпен айналысатындар да мемлекеттік емханаға бара ма – барады. Мектепте балалары оқи ма – оқиды», дейді «Қорғас» ШЫХО» АҚ президенті.
Қ.Джазиннің айтуынша, Үкімет инвесторларға барлық сала бойынша нөлдік салықтық жеңілдік жасауды қарастырған. Осылайша орталық өз тарапынан әлеуметтік салықтың қалдырылуы туралы ұсыныс жасап отыр. Бұл мемлекеттің әлеуметтік салалардағы жүктемесін жеңілдету үшін қабылданып отырған шара.
Болашақта 10 мың адамды жұмыспен қамтуға мүмкіндік беретін «Қорғас» ШЫХО-ның елдің әлеуметтік-экономикалық дамуын жеделдетуде ғана емес, оны орнықтыруда да маңызы зор. Бұған оның ең алдымен әлеуеті зор Қытай нарығының сұранысына бағытталуы мүмкіндік беріп отыр. Егер статистикаға көз жүгіртсек, тауар ұсыну жағынан Еуразиялық экономикалық одақ елдері біріксе де Қытай нарығының көлемімен шендесе алмайтынын аңғаруға болады. Сондықтан басты назар туризм саласы болу керек. Қ.Джазиннің сөзіне қарағанда, көршілес ШҰАР-ға ішкі Қытайдан жылына 65 млн турист келеді екен. Өйткені қытайлықтардың 85 пайызының құжаты жоқ. Сондықтан онда ішкі туризм қатты дамыған. Енді олар Қазақстанға да зор қызығушылық танытып отыр. Осы себепті бұл елдің аса ірі бірнеше компаниясы «Қорғас» ШЫХО-ға туристік бағыттар ұйымдастырып беруге өтініш жасап отыр. Бұл өтініш инвесторларға жасалатын жеңілдікпен бірге басталатын орталықтың жаңа даму кезеңімен тұспа-тұс келіп отырғанының өзі көңілге үлкен үміт ұялатады.
Кездесу барысында «Қорғас» басшысы халықаралық орталықта қазақстандық бизнестің үлесі 30 пайыздан кем болмауы керек деп есептейтіндігін айтты. Себебі «Қорғас» – Қазақстанның Шығыс қақпасы ғана емес, сауда сөресі. Бұл жерде біз өзіміздің әр саладағы табыстарымызды ғана емес, туристік қызметімізді көрсетудің де барлық мүмкіндіктерін қарастыруымыз қажет. Өйткені визасыз аймақта екі елдің азаматтары да жеке куәлікпен-ақ емін-еркін қыдырып, сауда-саттықпен айналысып, емделіп, демала алады. Оған қоса 50 гектарды алып жатқан «Happylend Khorgos» құрылысы аяқталса – қызықты көбейтіп, туристерді тартуға ықпал етеді. Бұл да Қазақстанның өз «Диснейленді» сияқты алып жоба.
Осы арада айналып өтпейтін тағы бір мәселе бар. Бұрын мұнда жолы түскендер кедендік бақылау бекеттеріндегі таң атпай басталатын ұзын-сонар кезек, иін-тірескен азапты біледі. Тауар таситындар да бұл қиямет-қайымнан талай рет өткен. Және бұл сүргінді қалта қаққыштар одан бетер сүрліктіріп келген. Сондықтан «Қорғас» басшылығы біраз уақыттан бері әрі-бері қатынайтындарды таңғы 7-00-ден бастап кешкі 19-00-ге дейін өткізе бастаған. Жаңадан ұйымдастырылған туристік топтарға арналған «жасыл дәліздің» де кезекті азайтуға септігі мол екенін көрдік. Келесі жылдың жаз айларынан бастап ШЫХО тәулік бойы жұмыс істеуге көшпек.
Егер өткен жылы күн сайын халықаралық орталықтан Қазақстан жағынан тәулігіне 1800-дей адам өтетін болса, биыл бұл көрсеткіш орта есеппен 5 мың туристке артқан. Жуырда ғана кеденде рекордтық көрсеткіш тіркеліп, бір күнде 6200 адам сапарлап келген. Ал Қытай жағынан күніне мұнда 12-15 мың адамдай келеді.
Біздің адамдардың да Қытайдан не таситынын тізе беру артық болар, бірақ көршілеріміз де Қазақстанның өнімдерін ықыласпен сатып алады. Олар көбінесе бізден азық-түлік, кондитерлік өнім, ұннан жасалған өнімдерді көптеп алады. Біздің өнімдерді көршілеріміз жоғары бағалайды.
Саясатпен де, үлкен экономиканың ұңғыл-шұңғылымен де ісі жоқ қарапайым халыққа керегі осы. Барыс-келіс, алыс-беріс үзілмесе болғаны. Бір кезде екі ел басшыларының бастамасымен қолға алынған инвестициялық әріптестіктің сауда-саттық, туристік, экономикалық кешендері көпке қызметін көрсетіп отыр. Салық түрлерінен босатылған, Duty Free үлгісіндегі аймақта ұтылып отырған ешкім де жоқ.
Сол сияқты Алматыдан арнайы барған журналистер Чжэньчжоу қаласындағы «Случангэ» Қытай мәдени-туристік орталығындағы ашылған медициналық орталықтың ашылуына да ортақтасты. Ондағылар сүйегіне зақым келген науқастарды емдейтін травматологиялық емдеу мекемесі болатындығын, бұл жерде дәстүрлі қытай медицинасынан бөлек, Қазақстан мен Қытай елдерінің осы саладағы ғылыми жетістіктері мен ізденістерін қолдануға мүмкіндік туатындығын айтып отыр.
Қалай болғанда да, қалтасы таяз, қаражаты санаулы туристер үшін халықаралық орталықтың пайдасы орасан. Қазір қазақстандық турагенттіктер жолаушыларды «Қорғасқа» қыдыртып қана қоймай, керек-жарағын түгендеуге, жолай Шарын шатқалдарына апарып, Шонжыдағы ыстық суға шомылдырып, Жетісу өңірін шама-шарқынша қамтуға ұмтылуда.
Осы сапарымызда ТМД елдерінен келген туристерді, іргеміздегі қырғыздарды, ресейліктерді аз кездестірген жоқпыз. Бір қызығы, «Қорғаста» тілмаш табу, сауда-саттық жасау қиын емес. Оның үстіне көршілерімізде қазақ тілін жап-жақсы меңгере бастаған екен.
Қазір Қазақстан жағы қонақүй бизнесін дамытуға күш салып отыр. 30 күн бойы визасыз сайрандауға болатын халықаралық орталыққа әлемдік брендтер көз салып, өз сауда нүктелерін ашуға ұмтылып жатқаны да жақсылықтың белгісі. Ебін тапқан отандық іскерлер үшін «Қорғас» – өте үлкен мүмкіндік. «Қорғас» шекара маңы ынтымақтастығы халықаралық орталығының даму даңғылына түсетін күндер алыс емес.
АЛМАТЫ – ЖАРКЕНТ – АЛМАТЫ