– Бұл шеберлік кәсіпті оқушыларға үйрететін үйірменің ашылғанына үш жылдың жүзі болды. 16 шәкіртім бар. Малдың тұяғынан және сүйектерінен музыкалық аспаптар, сондай-ақ түрлі кәдесый да жасаймыз. Тұяқ өңдеу үшін бір жетідей уақыт суға салып, жібітіп алып, сонан соң ыстық суға қайнатып немесе ыстық қоламтаға салып балқытып алса, кесіп, жонуға жеңіл болады. Жұмсап, балбыраған тұяқты июге, қалыпқа қысып, кез келген пішінге келтіру оңай. Тұяқты ыстық қоламтаға саларда суға малынған киізбен орап қойса, тұяқ күймей жақсы балқиды. Осындай бабына келіп тұрған тұяқ, сүйектерді пышақпен еркін жонып, түрлі бұйымдар жасауға болады, – дейді.
Ағаштан түйін түйген Сайран Мадияров та әңгімеге араласты. Менің үйірмемде 8 шәкіртім бар. Осы кәсіппен айналысқаныма 10 жылдай уақыт болды. Енді осы білгенімді шәкірттерге үйретіп жатырмын. Қайың, емен, үйеңкі ағаштарын пайдаланамыз. Домбыраның 5 түрін, қобыз және садақ қаруын жасасақ, алдағы уақытта топтамалы қару-жарақ түрлерін де жасау жоспарда тұр, деді ол.
Қызық көріп мал тұяғын қолыма алдым. Жылтырап, әзір тұрған материалдан күні ертең оқушылардың алтын қолынан түрлі бұйымдар шығатынын көз алдыма елестеттім.
Бүгінгі күнде біреу шетелге шығып, сол жақтан ескерткіш сыйлық алып келсе, мәз болып көрнекті жерге қоямыз. Ал жалпақталдық жас шеберлер жасаған өнер туындылары шетелдік кәдесыйлардан сапасы әлдеқайда жоғары.
Әсем БОЛАТ
Батыс Қазақстан облысы,
Қазталов ауданы
