Соның ішінде агроөнеркәсіп кешенін қарқынды дамыту мүмкіндігі туралы айтуы заңды. Мұны Елбасы жыл сайынғы Жолдауында үнемі жадынан шығарған емес. Неге? Өйткені қазіргідей өркениет кезеңі дәуірлеп тұрған шақта ауылшаруашылық саласын жаңа технологияға бейімдеу уақыт талабынан туындап отыр. Ең бірінші, бес жыл ішінде еңбек өнімділігін 2,5 есеге ұлғайту қажеттігін алға тартты. Сосын өңделген өнімнің экспортын ұлғайту мәселесі де бүгінгі күні басы ашық мәселе. Бұл – дұрыс. Бірақ, қайтіп көтеру керек? Айталық, жұмысты цифрлы жүйеге ауыстыру қазір жер-жерде ішінара болса да біртіндеп қолға алынып жатыр. Мәселен, біздің «Қарқын» ЖШС-нде мұны бастадық. Қыстың күні тағы нығайта түсеміз. Яғни бұл жағынан қыруар жұмыс істеліп жатыр.
Екіншіден, отандық өнімдерді халықаралық нарыққа шығарудың стратегиялық жолын табу арқылы қолға алған шаруаны алға бастыра беру қажеттігі де бекер емес. Бұл ретте өнімнің сапасына басты назар аударылуы тиіс. Онсыз экспортты ұлғайту мүмкін емес. Бүгінде елімізде комбайн, трактор секілді ауылшаруашылық техникалары құрастырылып жатыр. Жергілікті тауар өндірушілер өзімізден шыққан техникаларды алуы керек. Сонда салық та, қаржы да шетел аспай, өз ішімізде қалады. Оның үстіне, отандық техника сатып алған кәсіпкерлерге үкімет 25% субсидия төлейді. Бұл – үлкен жәрдем.
Жалпы, бұл жолғы Жолдауда да көптеген мәселе көтерілді. Бұл бір жағынан ауылда тұратын еңбекші қауымды ынталандыра түседі. Мәселен, Елбасы былтырғымен салыстырғанда әлеуметтік салаға бөлінетін қаржының 12 пайызға өскенін айтты. Жағымды жаңалық! Өйткені халықтың жартысы ауылда тұрады. Ауыл өркендесе, шаруашылық жұмыстары тежелмейді. Тек мемлекет ауылдарға ауыз су құбырын тартып, жолын жөндеп берсе шаруа біраз еңсеріліп қалар еді.
Өз басым Жолдаудан көп нәрсе ұқтым. Мұны жүзеге асыру кезек күттірмес шара деп білемін.
Сайран БҰҚАНОВ,
Қазақстанның Еңбек Ері
Қостанай облысы
