Үкіметтің баспасөз орталығында ұйымдастырылған жиында Энергетика министрлігінің өткен жылғы даму қорытындылары және алдағы жоспарлары туралы айтылған болатын. Министр онда Павлодар мұнай-химия зауытында жаңғырту жобасы жүзеге асырылғанын, сондай-ақ Атырау мұнай өңдеу зауытын жаңғырту жобаларының құрылысы аяқталғанын, қазіргі уақытта зауытта іске қосу-жөндеу жұмыстары жүріп жатқанын атап өтті.
«2017 жылы отын-энергетика секторының салалары рекордтық көрсеткіштерге қол жеткізді деуге болады», деді министр.
Қ.Бозымбаевтың айтуынша, өткен жылда газ өндіру көлемі шамамен 53 млрд текше метр немесе жоспардың 110 пайызын құраған. Оған қоса 2017 жылы 102,3 млрд кВсағ электр энергиясы, 106,7 млн тонна көмір өндірілген. 2017 жылдың қорытындысы бойынша газдандыру деңгейі – 47,38 пайыз.
Брифингте Қ.Бозымбаев Мемлекет басшысының Жолдауда белгілеген міндеттерін ескере отырып, 2018 жылға жоспарлар туралы да айтып берді. Министрдің айтуынша, Президенттің «Төртінші өнеркәсіптік революция жағдайындағы дамудың жаңа мүмкіндіктері» Жолдауына сәйкес Энергетика министрлігінің негізгі тактикалық міндеттерінің бірі ресурстық әлеуетті одан әрі дамыту болып табылады. Ол үшін басты құрал – Жер және жер қойнауын пайдалану туралы кодекс, оның нормалары 2018 жылғы шілдеден бастап күшіне енеді. Қазір заңға сәйкес барлық нормативтік-құқықтық база пысықталуда.
«Жер қойнауын пайдалану саласында салық саясаты жетілдірілді. Биылғы жылдың 1 қаңтарынан бастап жаңа Салық кодексі күшіне енді. Кодекстерді қабылдау және барлық қарастырылған нормаларды іске асыру мұнай-газ кешенінің стратегиялық маңызын сақтап қалуға мүмкіндік береді», деді министр. Сонымен қатар ол биыл сұйылтылған мұнай газы нарығында шектік бағаны мемлекеттік реттеуден кезең-кезеңмен шығару үшін электронды сауда алаңын енгізу жоспарланғанын атап өтті. Бұл баға белгілеу және сұйылтылған мұнай газын бөлу тетігін жетілдіруге мүмкіндік бермек. Қажетті заңнамалық нормалар 2018 жылғы желтоқсанға дейін пысықталады.
«Астананы газдандыру мәселесі өте өзекті, сондықтан қаржыландыру үлгісі мен көзін пысықтау жалғасады. Мұнай-газ саласында полипропилен өндірісі жобасы бойынша құрылыс жұмыстары басталады, деді министр.
Электр энергетикасы саласында «100 нақты қадам» Ұлт жоспарының 51-қадамында сенімділік пен энергиямен қамтамасыз ету сызбасын жеңілдету мақсатында өңірлерде энергия жеткізуші ұйымдарды ірілендіру қарастырылған.
Бұл ретте Қ.Бозымбаев 2018 жылы 15 энергия жеткізуші ұйым өз қызметтерін тоқтатуы тиістігін, жалпы энергия жеткізуші ұйымдардың саны 2022 жылға қарай 30 пайызға, яғни 160-тан 110-ға дейін қысқарады деп күтілуде екендігін атап өтті.
Мәліметке сүйенсек, «Нұрлы жол» бағдарламасы аясында Семей – Ақтоғай – Талдықорған – Алматы орамындағы Шүлбі ГЭС-нің 500 кВ желісі құрылысының ІІ кезеңі аяқталады. Осылайша «Солтүстік – Шығыс – Оңтүстік» өңіраралық жобасы 2018 жылдың соңына қарай толығымен іске қосылады. Жоба ШҚО мен Алматы облысының электр энергиясы тапшылығын қамтуға және энергетикалық тәуелсіздікті нығайтуға бағытталған.
Динара БІТІК,
«Егемен Қазақстан»