Сол күні құрамында облыстық жол-патрульдік полиция батальонының взвод командирі, полиция капитаны Дәурен Әбдішев, аға лейтенант Мақсат Серікбаев және старшина Мақсат Смаилов бар экипаж әдеттегідей қызметтік міндеттерін атқаруға кіріскен болатын. Олар «Қарағанды-Павлодар» тас жолын бетке алып, Қарағандыдан шыға бергенде, қала шетіндегі көшелердің қиылысында кенеттен тоқтай қалған автокөлікті байқап қалады. Оқиға болған жерге жылдам жетіп келгендерінде көлікті жүргізіп келе жатқан әйелдің орындықтың арқалығын шалқасынан түсіріп, қимылсыз жатқанын көреді. Көліктің ішінде, сондай-ақ, тағы бір әйел мен кішкентай бала болған.
Полиция қызметкерлеріне ойланып жатуға уақыт аз еді. Жедел қимылдаған олар есінен танған әйелді өз көліктеріне көтеріп әкеліп жатқызып, жақын маңдағы ауруханаға құстай ұшады. Сөйтсе, көлік жүргізуші әйел диабетпен ауыратын болып шықты, оның үстіне, құрсағында сегіз апталық шарана болған.
Бір қызығы, әлгі әйелдің жақындары полиция автокөлігінің қапталдағы нөмірін есте сақтап қалған да, ізінше Қарағанды облыстық ІІД Жергілікті полиция қызметінің басшысы Жалғасбай Жақаевтың атына қысылтаяңда көмек қолын созған тәртіп сақшыларын марапаттауды өтініп хат жолдапты. Ал өз міндеттеріне адал полиция қызметкерлері кішіпейілдік танытып, бұл істеген жақсылықтарын барынша жасыруға тырысқан.
Қайрат ӘБІЛДА,
«Егемен Қазақстан»
ҚАРАҒАНДЫ
