Қытайдың CCTV арнасы Ким Чен Ынның ҚХР-да 25-28 наурыз аралығында болғанын хабарлады.Солтүстік Корея басшысының Қытайға сапарлауының мәнісі неде? Әлемдік сарапшылар бұл туралы түрлі болжамдар айтуда. «Бұл сапар Ким Чен Ынның алдағы екі айға жоспарланған маңызды екі кездесулеріне қатысты» деседі болжаушылар. Айта кету керек, осыған дейін жабық саясат ұстанған КХДР басшысы сәуір айында Оңтүстік Корея президенті Му Чжэ Инмен кездесуді жоспарлап отыр. Сонымен қатар мамырда АҚШ президенті Дональд Трамппен келіссөз өткізу ниеті бар.
«Си Цзиньпин Дональд Трамппен кездескен. Онымен қалай сөйлесу керектігін біледі. Дегенмен Қытай басшысы Кимнің нені қалайтынын, қандай мақсаты барын анықтап алуы қажет. Бүгінге дейінгі алауыздыққа қарамастан Қытай әлі күнге дейін КХДР-ға ықпалын жүргізеді», дейді америкалық дипломаттар.
Айта кетерлік бір жайт, КХДР көсемінің Бейжіңге бронды пойызбен барғаны қызығушылық тудырып отыр. Дәл осы пойызбен 2011 жылы оның әкесі Ким Чен Ир да Қытайға жол салған. Бұдан бөлек, Жапонияның Nippon News Network арнасы вокзал аймағында қауіпсіздік шаралары күшейтілгенін, ал Тяньаньмэнь алаңында туристердің жүруіне тыйым салынғанын жеткізді.
Қытай мен КХДР-дың байланысы алдағы уақытта да өрбитін сыңайлы. Себебі Си Цзиньпин Дяоютайдағы резиденцияда өткен кездесуде Ким Чен Ын мен оның жұбайы Ли Соль Чжуды Қытайға тағы келуге шақырды.
Ал Ким Чен Ын өз сөзінде Қытай төрағасы Си Цзиньпинмен өткен алғашқы кездесуі екі елдің достық байланыстарын нығайтып, Корей түбегіндегі бейбітшілік пен тұрақтылыққа ықпал ететініне сенімділік білдірді.
Өткен жылы Солтүстік Кореяның баллистикалық зымырандарды бірнеше рет сынақтан өткізгенін бүкіл әлем сынға алған. Осыған қатысты бұл елге түрлі санкция да салынды. Ал Ким Чен Ын бастаған бірнеше лауазымды топ қара тізімге енгізілді.
Осыған орай, Сеул мен Токио Бейжіңнен КХДР көсемінің сапары туралы түсініктеме сұрап отыр. Осыған қатысты жақын күндері Қытай үкіметінің өкілі Ян Цзечи Сеулге бармақшы.
Жаһанға жойқын қаруымен сес көрсетіп отырған Солтүстік Кореяның биылдан бастап әлемге есік аша бастағаны қуантарлық жайт. Ал жақын күндері Си Цзиньпин мен Ким Чен Ынның кездесуінде нақты қандай мәселелер талқыланғаны белгілі болуы мүмкін.
Аян ӘБДУӘЛИ,
«Егемен Қазақстан»
