Салтанатты кеште қазылар финалға шығатын 5 аруды іріктеп алды. Оған Динара Баймұратова (Семей,17 жаста), Сабина Әзімбаева (Алматы, 18 жаста), Маймуна Күлкешева (Астана, 19 жаста), Әлфия Ерсайын (Атырау, 16 жаста), Екатерина Дворецкая (Карағанды, 19 жаста) ілікті. Осыдан соң еліміздің ең сұлуын дәстүрлі түрде қазақстандықтар тікелей эфир арқылы өткізілген онлайн және СМС дауыс беру арқылы таңдады. Оның қорытындысы бойынша, көп дауыс жинаған «Қазақстан аруы-2018» байқауының жеңімпазы анықталды. Нәтижесінде Атырау қаласының 16 жастағы тұрғыны Әлфия Ерсайынға 4250 адам дауыс беріп, жеңімпаз атанды.
Бұдан бөлек бірінші вице-мисс атағына Е.Дворецкая лайық деп танылса, екінші вице-мисс болып М. Күлкешева танылды. Ал үшінші вице-мисс атағын
Д. Баймұратова жеңіп алды. Байқауда бойжеткеннің қазақ тілін меңгеруі, әдебиет, тарих, салт-дәстүр бойынша білімі сынға түседі.
«Нәтижесін жариялаған кезде қатты қуандым. Әлфия, расында да бұл атаққа лайық. Өзі 16 жаста, қазақтың қарапайым отбасында тәрбиеленген. Оның бойында ерекше дарын бар. Қазақ қыздарының бәрі Әлфиядай болса екен деймін. Нағыз ару, ең бастысы оның бойында халқына, Отанына деген сүйіспеншілігі зор. Егер аруымызбен көгілдір экран арқылы ғана емес, жақынырақ, бетпе-бет таныссаңыз, оның жүрегі махаббатқа толы екенін байқайсыздар. Біз, қазылар алқасының мүшесі ретінде олардың әрқайсысымен тілдестік. Әлфияны «Қазақстан аруы» деп нық сеніммен айта аламын», – деді Президенттің «Алтын сапа» сыйлығының лауреаты, «Құрмет» орденінің иегері Ырза Тұрсынзада.
Әлфия Ерсайын Атырау гуманитарлық колледжінің 2-курс студенті. Осы жылдың басында өз колледжінде ең әдемі қыз болып танылса, өткен жылы «Атырау аруы-2016» байқауының үздік ондығына кірген еді. Қазіргі таңда модельдік бизнесте жұмыс істеп жатыр.
Ал байқау дирекциясының техникалық бөлім маманы биылғы халықтық дауыс берудің техникалық хаттамасын жаңартудағы жаңа жетістіктерін атады.
– Біздің биылғы басты міндетіміз – байқаудың тікелей эфирі кезінде үздіксіз дауыс беруді қамтамасыз ету болатын. Ол үшін дауыс берудің алғашқы күндері барынша жүктеме беріліп, сынақтан өткізілді. Нәтижесінде финал күні серверге түсірілген бір мезгілдегі жүктеме 30 мыңнан (2016 жыл) 70 мың (2018 жыл) пайдаланушыға дейін көбейіп кетті, бұл бүкіл елдің үздіксіз халықтық дауыс беру мүмкіндігін қамтамасыз етті, – деді техникалық бөлімнің маманы Раим Дадыбаев.
Бір айта кетерлігі, ұлттық финал әдеттегідей жаңа жыл қарсаңында емес, Наурыз мерекесі күндерінде өткізілді. 22 наурыздан бастап «Қазақстан аруы-2018» ресми сайтында байқау финалистеріне дауыс беру басталған еді. «Қазақстан аруы» байқауының жеңімпазы ақшалай жүлдеден бөлек, люкс брендтерімен жарнама бойынша бірқатар келісімшарт жасайды және тиісінше «Әлем аруы-2018» байқауында Қазақ станның намысын қорғайтын болады.
Қазақстан аруы» байқауы Қазақстан Республикасы аумағында «Дүние жүзі аруы» (АҚШ), «Әлем аруы» (Ұлыбритания) сияқты ірі әлемдік байқаулардың арнайы лицензияларының бірден-бір иеленушісі.
Ая ӨМІРТАЙ,
«Егемен Қазақстан»
