Қытай мен ЕАЭО келісімге келді
Қытай мен Еуразиялық экономикалық одақ сауда-экономикалық әріптестік орнату жөнінде ортақ мәміле жасады. Xinhua агенттігінің хабарлауынша, бұл – екі тарап арасында жасалған кең көлемдегі тұңғыш келісім.
Құжатқа Қытайдың коммерция министрінің орынбасары Фу Цзыин, Еуразиялық экономикалық комиссияның басқарма төрағасы Тигран Саргсян және ЕАЭО мүшелері қол қойды. Оған Астана экономикалық форумы аясында қол жеткізілді.
Келісім кедендік әріптестік, сауда байланысы, зияткерлік меншік құқығы, салалық серіктестік секілді 13 бағытқа арналған. Сондай-ақ құжатта электронды коммерция тәрізді жаңа салалар қамтылған.
Бұдан бөлек, Қытай мен ЕАЭО кедендік бақылау үдерістерін жеңілдетуді, тауарға салынатын салықты азайтуға қол жеткізіп, әріптестік орната отырып, ақпарат алмасу жөнінде уағдаласты. Бұл келісім 2019 жылдың басынан іске қосылмақ.
Xinhua агенттігінің пайымдауынша, құжат «Бір белдеу – бір жол» бастамасы аясында жүзеге асырылатын маңызды қадам. Келісімге сәйкес, екі тарап арасындағы әріптестік нығайып, сауда-экономикалық байланыс күшейіп, тауар айналымы артады.
Агенттіктің мәліметтеріне сүйенсек, тауарға салынатын қосымша салықтардың жойылуы индустриялық даму мен сауда-экономикалық қатынасты күшейтетін қолайлы орта қалыптастырады.
Жаһандық мәселелерді талқылайтын жиын
Қазақстанда Астана экономикалық форумы өтті. Үш күнге созылған саммитте саясаткерлер, ғалымдар мен сарапшылар әлемдік трендтерге ілесу, оның әлем мен Қазақстанға әсері туралы көкейкесті мәселелерді талқылады. «Қазақстан Президенті Нұрсұлтан Назарбаев Астана экономикалық форумының ашылу салтанатында «Әлем теңдессіз жылдамдықпен өзгеріп, тағы да жолайрыққа тап келді. Адамзат қай бағытқа бұрылуды күтіп отыр: дамудың дәуірі ме, әлде құрдымға кету ме», деді. Жиынға келген бес жүзге жуық ғалым мен саясаткер, экономист пен басқа сала өкілдері жүзге жуық панельді сессия мен дөңгелек үстелге қатысты», деп хабарлады EFE агенттігі.
Агенттік форум жұмысына әлемге әйгілі бірқатар тұлғалардың келгеніне де тоқталған. Атап өтер болсақ, ауқымды жаһандық шараға Apple компаниясының негізін салушылардың бірі Стив Возняк, Францияның бұрынғы президенті Франсуа Олланд, БҰҰ-ның бұрынғы бас хатшысы Пан Ги Мун, атақты физик Митио Каку қатысты, делінген агенттіктің жарияланымында.
Иранмен мәміле жасасты
Еуразиялық экономикалық одақ пен Иран Астанада экономикалық форум аясында екіжақты импорт және экспорт тарифын жоюға мүмкіндік беретін еркін сауда аймағын құру туралы келісім жасасты. Latin American Herald Tribune газетінің ақпаратына сүйенсек, құжаттың қызмет ету мерзімі – үш жыл. «Иран тарапы алып экономикалық ұйымның әріптесі болды. Келісім бүкіл аймаққа жемісті болмақ», деді Иранның өнеркәсіп және сауда министрі Мохаммад Шариатмадари.
Ресей, Қазақстан, Беларусь, Армения және Қырғызстаннан құрылған Еуразиялық экономикалық одақ бұған дейін Вьетнам және Қытай секілді мемлекеттермен еркін сауда жөнінде келісім жасасқан болатын», деп хабарлады Latin American Herald Tribune.
Басылымның хабарлауынша, Шариатмадари жылына 20 миллиард долларға жуық экспорт шығаратын Иран мемлекеті ЕАЭО үшін тиімді әріптес екенін мәлімдеген. Министр құжаттың тараптар арасындағы сауда байланысын нығайтып, экономиканы тұрақтандыруға көмектесетініне сенім білдірген.
Еуразиялық экономикалық комиссияның басқарма төрағасы Тигран Саргсян да Иран мен ЕАЭО арасындағы келісімнің маңызы зор екенін айтып отыр. Оның пікірінше, бұл – экономикалық қарым-қатынас орнатуға бағытталған алғашқы қадам. «Иран нарығы өте үлкен және тез дамып келеді. Сондықтан біздегі бизнес көшбасшылары аталған елге қызығушылық танытып отыр», деді Т.Саргсян.
Latin American Herald Tribune басылымы сауда келісімі Иран үшін тағдыршешті сәтке тура келгенін хабарлады. Естеріңізде болса, осыдан бір апта бұрын АҚШ тарапы Иран мен ядролық державалар арасындағы келісімнен шығатынын мәлімдеген болатын. Сондай-ақ Иранға салынатын санкцияны күшейтетінін жеткізді.
Шолуды дайындаған Абай АСАНКЕЛДІҰЛЫ,
«Егемен Қазақстан»
