Мұнайлы өңір тұрғындары елордадағы мемлекеттік академиялық филармонияның классикалық және эстрадалық вокал бөлімі, «Сарыарқа» халық музыка ансамблі, «Шалқыма» халық биі ансамблі, эстрадалық би ансамблінің өнерлеріне тәнті болды. Облыстық халық шығармашылығы орталығында өткен «Астанадан ақ тілекпен», «Елордадан елге сәлем» атты концерттер де атыраулықтарға айрықша көңіл күй сыйлады.
Жайық жағасын әсем әнмен тербеген өнерпаздармен қатар қолөнер шеберлері де бұйымдарын ала келді. Ш.Сариев атындағы көркемсурет және өнер музейіндегі көрмеге отандық суретшілердің 100-ден астам туындысы қойылды.
Астана қаласы мемлекеттік академиялық филармониясының бөлім жетекшісі Арайлым Рахымқызы: «Атыраулық көрерменнің өнерге деген ықыласы шабыт сыйлады. Құрмет-қошеметке риза болдық. Астана мерейтойының қарсаңында барлық өңірлерге гастрольдік сапармен шығуды жоспарладық, ендігі бағытымыз Маңғыстау облысы», – дейді.
Астанадағы Жастар театры да мұнайлы аймаққа келіп, репертуарларындағы мюзикл, сахналық повесть, халық ертегісі секілді қойылымдарды атыраулықтардың назарына ұсынды. Елорда төрінде шығармашылықтарын шыңдап жүрген өнер ұжымдарының қай-қайсысының да деңгейі жоғары екенін бағамдаған талғампаз көрермен оң баға беріп, қошемет көрсетті.
Бақытгүл БАБАШ,
«Егемен Қазақстан»
АТЫРАУ