Шеру салдарынан экономикаға нұқсан келді
Дүйсенбіден Аргентинада жаппай шеру болып, көптеген қоғамдық қызмет тоқтап, экономикаға айтарлықтай нұқсан келді. Шеруге шыққандар айлықты көтеруді талап етіп, Халықаралық қаржы қоры мен ел билігі арасындағы құны 50 миллиардтық келісімге қарсылық білдірді.
Al Jazeera арнасының хабарлауынша, наразылықтың кесірінен Аргентинадағы қоғамдық көлік қызметі тоқтаған. Әуежай жұмысшыларының ереуілге шығуы салдарынан 600-ге жуық әуе сапары кейінге шегеріліп, 71 мыңға жуық жолаушы зардап шеккен.
Сонымен қатар дүкендер, жанармай бекеттері, мектептер, банктер және порттар жұмысын тоқтатқан. Ел астанасы Буэнос-Айрес көшелерінде көліктер кептелген.
Аргентина билігі таяуда жалақы мөлшерін 15 пайызға ғана ұлғайту жөнінде шешім қабылдаған болатын. Ал елдегі инфляция мөлшері 26 пайызға жеткен. Жұмысшылар биліктің осы шешіміне наразылық білдіріп отыр.
Сонымен қатар президент Маурисио Макри ұлттық валютаны девальвациядан сақтап қалу мақсатында Халықаралық қаржы қорымен келісіп, 50 миллиард доллар кредит алуға қол жеткізді. Несие шартына сәйкес, 2019 жылы қаржы тапшылығын 1,3 пайызға дейін азайту қажет. Өз кезегінде бұл бюджеттік қызметкерлерді көптеп қысқартуға әкеп соғып, жұмыссыздар санын арттыруы мүмкін. Қазіргі таңда Аргентина халқының 9 пайызы жұмыссыз.
Жалпы, бұл – Аргентинаның Бүкілхалықтық еңбек конференциясы ұйымдастырып отырған үшінші шеру. Ұйым құрамында үш миллионнан астам жұмысшы бар. Бұған дейін олар 2017 жылғы сәуірде және желтоқсанда жаппай ереуілдеген болатын.
ҚХР айға ғарыш стансасын жібереді
Қытай билігі ғарышты игеру үшін бірқатар шаралар атқарып жатыр. Солардың бірі – айды зерттеуге арналған аппарат жіберу. Таяуда айдың бізге көрінбейтін бетін барлау мақсатында Queqiao қондырғысы жіберілетіні мәлім болған-ды.
ChinaDaily сайтының пайымдауынша, бұл сапар – айдың бізге көрінбейтін бетін бағдарлап, айды зерттеу жұмыстарын жетілдіруге оң ықпалын тигізбек. Ғарыш аппараттары айға «Чанъэ-4» ғарыш стансасымен жеткізілмек. Аталған миссия 2016 жылы жүзеге асуы тиіс болған. Бірақ түрлі себептерге байланысты кейінге шегерілді.
ChinaDaily-ге сұхбат берген Бейжің ғалымы Чжэн Юнчуньның айтуынша, осы қондырғылар арқылы аспан әлемін кеңінен зерттеуге мүмкіндік туады. Өйткені Айда ауа болмағандықтан, телескоптар ғарышты анық көруге жағдай жасайды.
Оңтүстік Корея мен КХДР келісімі
Солтүстік Корея мен Оңтүстік Корея делегациясы түрлі жағдайларға байланысты отбасынан айрылып, шекараның екі жағында қалған отбасыларды табыстыру бағдарламасын қайта жалғастыруға қатысты келіссөз өткізді.
Бұл келісім екі ел арасындағы қарым-қатынасты жақсарту мақсатында ұйымдастырылып отыр. Естеріңізде болса, сәуірде Оңтүстік Кореяның президенті Чже Ин Мун Солтүстік Корея басшысы Ким Чен Ынмен кездескен болатын. Аталған жиында президенттер қазіргі таңда туындаған қиындықтарға тоқталып, бірқатар мәселелерді талқылаған еді. Соның бірі – екі ел арасындағы қарым-қатынасты жақсарту.
Reuters агенттігінің хабарлауынша, жиын барысында КХДР делегациясын бастап келген Пак Йонг: «Біз өзара сенімді нығайта отырып, жақсы нәтижеге қол жеткізуге талпынамыз. Басшыларымыз бастап берген келісімді одан әрі жалғастыру біздің міндетіміз» деген екен.
Өз кезегінде Оңтүстік Корея өкілдері бөлініп кеткен отбасыларды қайта табыстыру бағдарламасын жалғастыру адам құқығы мәселесі екенін жеткізген.
Айта кетерлігі, Корей түбегіндегі соғыс кезінде көптеген корейлер отбасынан ажырап, шекараның екі жағында қалып кеткен еді. Оларды қайта табыстыру жұмыстары бұған дейін де бірнеше рет өткізілді. 2000 жылдан бері 23 676 азамат қайта табысқан екен.
Қазіргі таңда Корей соғысының зардабын тартқандардың алды 80-нен асып кеткен. Reuters агенттігің хабарлауынша, осы бағдарлама аясында ағайын-туғанымен қайта кездесуге өтініш білдірген 131 мыңнан астам адамның 56 пайызы қайтыс болып кеткен.
Шолуды дайындаған Абай АСАНКЕЛДІҰЛЫ,
«Егемен Қазақстан»
