Жобаның жалпы құны – 280 млн теңге. Балабақшалардың ашылу салтанатында облыс әкімі Жансейіт Түймебаев тағдырдың салғанына еріксіз мойынсұнған жас жеткіншектерге қолұшын созып, көмек берген кәсіпкерге алғысын білдірді. Сондай-ақ облыс әкімі демеушілік жасап жүрген кәсіпкердің еңбектері өзгелерге үлгі боларлық шынайы патриотизмнің көрінісі екенін айтып өтті.
– Елбасы Нұрсұлтан Назарбаевтың «Болашаққа бағдар: рухани жаңғыру» бағдарламалық мақаласында туған жерін ұмытпай, оған қамқорлық жасағысы келген кәсіпкерлерді, шенеуніктерді, зиялы қауым өкілдері мен жастарды қолдау керектігі, бұл – қалыпты және шынайы патриоттық сезімнің әркімде болуы айтылған болатын. Мемлекет басшысы кәсіпкерлердің әлеуметтік жауапкершілігін назарынан тыс қалдырған емес. Яғни мемлекеттік қолдау көрсетіліп, кәсіпкерліктің дамуына барлық жағдай жасалып келеді. Біз де мүмкіндігімізше мұқтаж жандарға көмектесіп, елімізде әлеуметтік жағдайдың жақсара түсуіне үлес қосуымыз қажет. Осы орайда біздің компания жүзден астам балаға қуаныш сыйлап отыр. Игі істер алдағы уақытта да жалғасын табатын болады, – дейді бизнесінен түскен табысынан жыл сайын елдің игілігі үшін әлеуметтік маңызы бар нысанды тапсырып отыруды ұстаным еткен Қайрат Молдасейітов.
Жалпы, оңтүстікте «Рухани жаңғыру» бағдарламасы аясында кәсіпкерлер демеушілігімен көптеген әлеуметтік нысандар салынып, ел игілігіне берілуде. Айта кетелік, Түркістан облысында «Астананың 20 жылдығына – 20 нысан» акциясы жүріп жатыр. Мереке қарсаңында облыста және Шымкент қаласында әлеуметтік нысандар мен кәсіпорын саласында 20 нысанды ел игілігіне беру көзделген. Пайдалануға берілетін нысандардың қатарында 4 балабақша, Шардара ауданында 10 пәтерлі екі қызметтік тұрғын үй мен Төле би ауданында 20 пәтерлі бес қабатты, ал Бәйдібек ауданында 1 пәтерлі 20 коммуналдық тұрғын үй бар.
Ғалымжан ЕЛШІБАЙ,
«Егемен Қазақстан»
Түркістан облысы
