Іс-шараға «С.Сейфуллин атындағы ҚазАТУ» АҚ Басқарма төрағасы Күрішбаев А.Қ., Қазақстан фермерлер одағының президенті А.К.Дарынов, университет мамандары, AgroSmart компаниясының өкілдері мен өзге де 70-тен астам Қазақстандық шаруашылықтар қатысты.
Университет ректоры Ақылбек Күрішбаев өз сөзінде білім ордасының жетістіктері туралы қысқаша баяндап, университеттің ғалымдары ауыл шаруашылығын цифрландыру саласында ерекше тәжірибе жинақтағандығын атап өтті. Сондай-ақ, биылғы жылдың басында университет Ауыл шаруашылығы министрлігі тарапынан агроөнеркәсіптік кешенді цифрландырудың ғылыми-әдістемелік орталығы ретінде құрылғанын атап көрсетті. Ауыл шаруашылығы министрлігінің цифрлау кеңсесі университеттің ГАЖ технологиясы орталығына орналастырылған деді. Сонымен қатар, соңғы жылдары университеттен білім алып шыққан жас мамандардың білім деңгейі көңіл қуантарлық және олар соңғы үлгідегі ауылшаруашылығы технологиясымен жұмыс жасауға дайын екендігін баса айтты.
Университет проректоры Қайрат Айтуғанов Ақмола, Қарағанды, Қостанай және Солтүстік Қазақстан облыстарындағы 9 пилоттық шаруашылықтарды цифрландыру жобасы қалай іске асырылғандығы туралы айта келе бұл мүмкіндік кез келген фермердің шаруашылығында болады деді. Ауыл шаруашылығы сандық үлгіге өтпейінше шаруа алға жылжу мүмкін болмайды деп атап көрсетті.
Ауыл шаруашылығы министрлігінің Жер қатынастары және жер ресурстарын басқару бөлімінің бастығы Жанар Қаржанова жер комиссиясының жұмысы туралы егжей-тегжейлі айта келе жерді реформалау және жер құқығы туралы сұрақтарға жауап берді.
Тараптар агроөнеркәсіп кешенін цифрландыру саласындағы қазіргі жағдай мен өзекті жұмыс туралы өз пікірлерін білдірді. Семинар нәтижесі бойынша жемісті пікірталас өткізілді, қатысушыларға қойылған сұрақтарға толыққанды жауап бере отырып туындайтын мәселелерді жеке-жеке емес бірлесіп шешу керектігі туралы келісімдер жасалды. Себебі ауыл шаруашылығы аса ауқымды сала болғандықтан онымен жалғыз бетпе-бет келу нәтижесіз. Фермерлер өз кезегінде ҚазАТУ әрқашан басқа аграрлық саладағы білім ордаларына қарағанда оқ бойы екендігін айтып, өздерінің де университет базасында білімдерін жетілдірудің мүмкіндіктерін қарастыруды сұрады. Себебі бітірушілер ауылшаруашылық кәсіпорындарына қажетті мамандар, агрономдарға күрделі фитосанитариялық жағдайға байланысты үлкен қажеттілік туындап отырғандығын айтып отыр.
Семинар барысында ұшқышсыз әуе кемесінің жұмысы көрсетілді және агроинженерияның ғылыми эксперименталды алаңы таныстырылды.
Тараптар ағымдағы жағдайды және ауыл шаруашылығы цифрландыру саласындағы нақты жұмысы туралы пікірлерімен бөлісіп, өз ара ынтымақтастық туралы келісім жасады.
