Заманауи кеңсенің ашылуына «Самұрық-Қазына» қорының басқарма төрағасы Ахметжан Есімов, вице-премьер Асқар Жұмағалиев, Ақпарат және коммуникациялар министрі Дәурен Абаев, Қазпоштаның басқарма төрағасы Сәкен Сәрсенов және таяуда Астанаға келген робот София қатысты.
– Қазпошта жаңа кеңсесін IT-саладағы соңғы жетістіктердің барлығы жиналған жерде ашып отыр. Біз отандастарымызға дәстүрлі қызметтерді мүлдем жаңа форматта алуға болатынын көрсетеміз. Жаңа кеңсенің ашылуына Софияны да кездейсоқ әкелген жоқпыз. Цифрлы трансформация идеясы бүкіл әлемді жаулап алған уақытта біз де үздік әлемдік тәжірибелермен танысып, үздік мамандардан сабақ алу мүмкіндігімізді жіберіп алмауға тырысамыз. Қазір Үкімет тарапынан цифрландыру идеясын жан-жақты қолдаудың арқасында біздің еліміз де осы салада алдыңғы қатарға қосылып, мамандар сұранысқа ие болуда, – деді Қазпошта басшысы С.Сәрсенов.
Шараға қатысушы әлемдегі ең танымал робот – геноид София меймандарға Қазақстанның цифрлы жүйеге ден қойып отырғандығынан хабардар екенін жеткізіп, Астананың көркіне тәнті екенін айтып берді. Аталған робот жасанды интеллектке ие, көрнекі ақпаратты және тұлға тану технологиясын өңдеу функцияларымен жабдықталған. Робот Астанаға Қазпоштаның құжаттарын электронды түрге көшіріп жатқан Documentolog компаниясының қолдауымен жеткізілді.
Дәстүр бойынша, іс-шараның қонақтарын Жапониядан әкелінген жаңа робот-кеңесші Pepper қарсы алды. HD-камералар және сенсорлардың арқасында ол қоршаған ортасын танып, адам эмоцияларын біле алады. Pepper қатысушыларға Қазпошта қызметтері туралы мәлімдеп, оларға экскурсия жүргізді. Айта кетерлігі, Қазпоштаның жаңа кеңсесінде дәстүрлі банкоматтар мен төлем терминалдарымен қоса гибридтік банкомат бар. Одан онлайн кеңестер және post.kz қызметтерін алуға, төлем карталары немесе қолма-қол ақша көмегімен түрлі төлемдер төлеуге болады. Клиенттерді сәйкестендіру саусақ іздері мен биометрия арқылы жүргізіледі. VR-бөлімінде көрмеге келушілер виртуалды турды тамашалап, қызметтермен танысып, трек-нөмірі бойынша сәлемдемесін де таба алады. Сонымен қатар AR-киіну бөлмесі онлайн-дүкеннен тапсырыспен алған киімдерді киіп көруге мүмкіндік береді. Принтер арқылы 30 минуттың ішінде (бас киім, мойынорағыш, орамал, жейде) басып шығарып, селфи-дронның көмегімен түскен суретті шығарып алуға немесе электронды поштаға жіберуге болады. Бұған қоса, кеңседе Назарбаев Университетінің түлектері жасаған робопошташы орналастырылған. Ол ЭКСПО аумағында орналасқан кеңселерге алдын ала белгіленген маршрутпен хат-хабарлар жеткізіп тұрады.
Еркежан АЙТҚАЗЫ,
«Егемен Қазақстан»