Міне, Елбасы ерекше екпін беріп отырған Алакөлге соңғы жылдары келушілер қатары көбейді. Өйткені осыдан бірнеше жыл бұрынғы жағажай мен инфрақұрылым қазіргімен салыстыруға келмейді. Бұл алыс та болса ауасы да, суы да дәру Алакөлдің туристік тартымдылығын арттыра түсті. Әсіресе Шығыс Қазақстан облысы жағалауына келушілер үшін кешенді жұмыс атқарылуда.
Барша демалыс үйлері мен туристік нысандарға көріктендіру мен абаттандыруға, қызмет көрсетуге, қауіпсіздік сақтауға байланысты талап күшейтілді. Жағалауда жанға жайлы аура қалыптастыру мақсатында көріктендіру, абаттандыру жұмыстары жүргізілді. Ауданішілік Алакөлге жеткізетін жолдар жарқырай түсті. Расында Алакөл демалыс аймағының жайлылығы жыл санап жақсарып келеді. Туристерге арналған жаңа орындар пайда болып, ескілері қайта жөндеуден өтуде. Мұның барлығы жағажайдың халықаралық талаптарға сай жұмыс істеуі үшін жасалып жатыр.
Кеше ғана өңір басшысы Даниал Ахметов Үржар ауданына барған жұмыс сапары аясында Алакөл жағалауындағы демалыс аймағының көріктендірілу барысымен танысып, тынығушылармен әңгімелесті.
– Алакөл жағалауын абаттандыруға барлығы 4,5 миллиард теңге бөлінді. Бұл қаражаттың ақталып жатқаны қуантады. Өйткені Ресейден, Финляндиядан келіп жатқан туристерді көрдік, – дейді Д.Ахметов. – Биыл жолаушылар Өскемен мен Семей қалаларынан Алакөлге дейін темір жол бағытымен келуге мүмкіндік алды. Сондай-ақ Алматы, Астана, Семей мен Өскеменнен әуе бағыты да жұмыс істеп тұр. Әрине мұның бәрі әлі де жеткіліксіз. Келер жылы біз түйісетін рейстердің проблемасын шешеміз. Яғни олар жолаушыларды көбірек жеткізетін болады. Биылғы тәжірибеміз қатынас жолдарын қаншалықты ұлғайту қажеттігін көрсетеді. Бүгін тұрғындар мен туристер қосымша купелі вагондарды ашуды сұрады. Бұл өтініш орындалатын болады.
Өңір басшысы сонымен бірге ағымдағы жылы Алакөл жағалауының абаттандырылуы жалғасатынын, байқалған бірқатар кемшіліктер рет-ретімен қалпына келтірілетінін жеткізді. Ал автокөлік жолдарына қатысты мәселе алдағы үш жылда шешімін таппақ. Қазіргі кезде көл жағасындағы Қабанбай ауылы мен Жалаңашкөл темір жол стансасы аралығындағы жол жөнделуде.
Абаттана түскен Алакөлді көргендегі әсерлерімен туристер де бөлісті. Семейлік Айбек Балташбеков 1985 жылдан бері тұрақты түрде әр шомылу маусымында Алакөлге келетінін, алғаш келіп жүрген жылдарында жағалауда тек шатырлар ғана болғанын, жайлы демалыс туралы армандаумен ғана шектелетінін, ал биыл келгенінде Алакөлді танымай қалғанын, бір жылда біршама жұмыс жасалғанына таңғалғанын жеткізді.
Жағалауда демалушылар барлық жағдайдың жақсы екенін, алайда қазіргі саны күрт көбейген демалушылар үшін жағажайдың тарлық етіп жатқанын, алдағы уақытта оны соза түсудің қажеттігін айтуда. Бұл ретте былтыр көл жағалауында батпақты, қамысты жерлерді құрғату арқылы біршама жаңа нысандар, соның ішінде саябақ құрылысы салынған болатын. Демалушыларға әсіресе кешкі арбаттың аурасы ұнайды. Арбат демекші, Алакөлдің орталығы осы кезде ығы-жығы стихиялы сауда орындарынан арылып, кеңейтіліп, қыш тақталар төселіп, туристердің кешқұрым серуендеп, естелікке фотосуретке түсетін көрікті орнына айналды. Мұнда кешкі көл келбетін тамашалауға болады. Әдемі орындықтар да қойылған.
«Алакөл өте тез дамып келеді. Сонымен бірге бағасы да қалта көтерерліктей, көңілден шығады. Бұрынғыдай емес, қызмет көрсету саласы да жолға қойылған. Қанша дегенмен кәсіпкерлер көп дүниені үйренді. Сондықтан Алакөлдің жұлдызы оңынан туып келеді деуге болады» дейді демалушылар.
Алакөлге бұрын Ресей Федерациясынан туристер көп келетін болса, соңғы кездері басқа да мемлекеттерден келушілер бар. Солардың бірі Финляндиядан келген Роза Смалханқызы демалушылармен кездескен облыс әкіміне Астана мен Алматыдан аудан орталығы Үржарға дейін ұшып келетін ұшақтарға қосымша рейстер ашуды ұсынды. Оның айтуынша, финдер шомылу маусымы қызған кезде Астана мен Алматыға тез әрі оңай келе алады. Ал әрі қарай соңғы нүктеге жету оларға қиындық тудырады, өйткені билет жоқ.
«Финдер Алакөлді көргісі, суында шомылғысы келеді. Сондықтан екі ел арасындағы туризмді дамыту мақсатында қосымша әуе тасымалын ашқан абзал болар еді. Бірінші кезекте финдерді мұнда денсаулықтарын түзетуге болатыны қызықтырса, екінші кезекте олар еліміздің жергілікті флора мен фаунасынан да жан рахатын табады. Өйткені онда ертегідей ерекше әдемі таулар мен көлдер жоқ», дейді Роза Смалханқызы.
Естеріңізге сала кетейік, Алакөл жағалауын бетке алған жолаушылар үшін Жалаңашкөл стансасына дейінгі жолаушылар пойызы кестесіне Семей стансасынан қала маңына жаңадан қатынайтын пойыз қосылды.
Думан АНАШ,
«Егемен Қазақстан»