Әрине жобаны жариялау бар да, оны жүзеге асыру бар. Жоба бойынша жұмыстың маңызды кезеңі – оның мақсаты мен маңызын қалың бұқараға кеңінен жеткізіп түсіндіру ғой. Әсіресе өңірдегі ең іргелі оқу орны, байырғы білім ордасы ретінде Махамбет Өтемісов атындағы Батыс Қазақстан мемлекеттік университетіне артылған жауапты міндетті анық сезінеміз.
Елбасының «Болашаққа бағдар: рухани жаңғыру» бағдарламалық мақаласы біздің университет порталының басты бетінде, факультеттер сайтында орналастырылды. Әлеуметтік желілерде бағдарламаға қатысты арнайы ақпарат пен атқарылып жатқан жұмыс жөніндегі мәлімет тұрақты таратылып келеді. Мақаланың негізгі ойлары мен басым бағыттарын насихаттау мақсатында университеттің оқу ғимараттарында, акт залдары мен кабинеттерде көрнекі құралдар ілінді. LED-экран арқылы видео және көрнекі ақпарат жүйелі беріліп, арнайы «Рухани жаңғыру» мәжіліс залы жабдықталды.
Ең бастысы, бұл қоғамдық жобаны іске асыру үшін ғылыми-әдістемелік және қолданбалы-тәжірибелік қолдау қажет. Осы бағытта БҚМУ-да 15 мәрте ғылыми-практикалық конференция, 12 рет дөңгелек үстел мәжілісі өткен екен. Бұл басқосуларда айтылған ұсыныс-пікірлер әрдайым біздің басты назарымызда.
Бір ғана мысалды айта кетейін. Бағдарламаға қатысты негізгі бағыттың бірі – латын әліпбиіне көшу жобасы болатын. Бұл тұрғыда университетте қомақты және кешенді іс тындырылды. Осы тақырыпқа бірнеше конференция, дөңгелек үстелдер мен семинарлар ұйымдастырылды. Студент жастармен көптеген кездесулер өтті. БАҚ-тағы пікір алмасу және түсіндіру шараларына БҚМУ өкілдері белсенді қатысты. Біздің лингвист-ғалымдар латын әліпбиіне көшудің ғылыми-әдістемелік жағын қамтуға атсалысуда. Арнайы семинарлар өткізіліп, әдістемелік құралдар дайындалып жатыр. Біз дайын асқа тік қасық болмай, ел ертеңіне қажетті игілікті өзіміз жасауға тырысамыз.
Көптің көңілінен шыққан маңызды бағыт – «Туған жер» жобасы. Бұл жоба шеңберінде ғылыми және ғылыми-танымдық экспедициялардың орны ерекше. Соңғы кезде университетте бірнеше ғылыми-танымдық экспедиция ұйымдастырылды. 2017 жылы тамыз айында «Қазақстанның жалпы ұлттық 100 киелі нысаны» тізіміне енген ортағасырлық Жайық қаласы аумағында доцент Мұрат Қалменов археологиялық қазба жұмысын жүргізген еді. Университеттің профессорлық-оқытушылық құрамы мен студенттерден жасақталған экспедиция Бөкей Орда өңірінде, Шыңғырлау ауданында жұмыс атқарып қайтты. Мұның бәрі теория мен практиканы ұштастырып, студент санасында ұмытылмас әсер сыйлары анық.
«Жаңа гуманитарлық білім. Қазақ тіліндегі 100 жаңа оқулық» жобасы бойынша жарық көрген 18 оқулық университетке жеткілікті көлемде алынды. Осы оқулықтар жөнінде профессор-оқытушылар құрамы, қызметкерлер мен студенттер БАҚ арқылы өз ой-пікірін білдіріп, оқу үрдісінде тиімді пайдалану жолын қарастыруда. Бұл жерде ғылыми-әдістемелік бөлімдер мен Сараптама кеңесі белсенді жұмыс істеп отыр. Мысалы, Сараптама кеңесінде «Иудаизм, христиандық пен исламдағы 4000 жылдық ізденіс: құдайтану баяны» атты оқулық қызу талқыланды.
Оқу орнымыздың ғалымдары мен қызметкерлері осы бағыттағы жұмыста тек университет көлемімен шектелмей, қала, облыс және шетел көлемінде де таралды. Соның ішінде «Жаhандағы заманауи қазақстандық мәдениет» жобасы бойынша шараларға ерекше көңіл бөлінуде. Атап айтсақ, еліміздің мәдениетімен таныстыру алыс-жақын шет елдеріндегі әріптес білім ордаларында, мысалы Польша, Латвия, Ресей оқу орындарында тұрақты өткізілуде. 2017-2018 оқу жылында Польша Республикасының Быдгощ қаласындағы экономика университетінде, кейін Латвия Республикасының Рига техникалық университетінде «Рухани жаңғыру» бағытын Қазақстанның мәдениетімен таныстыру шаралары табысты өтті.
Келешекте «Рухани жаңғыру» бағдарламасының ғылыми негізін күшейту үшін ғылыми жобалар бойынша жұмыстың көлемін кеңейту қажет. Сол себепті әлеуметтік және гранттық ғылыми жобалар да қолға алынуда. Университет факультеттерінде диплом жобалары мен магистрлік диссертация тақырыптары базасы қоғамдық сананы жаңғыртудың негізгі бағыттарына арналған зерттеу тақырыптарымен толықтырылды.
«Рухани жаңғыру» бағдарламасына арналып Л.Н.Гумилев атындағы ЕҰУ базасында ұйымдастырылған жас ғалымдардың республикалық ғылыми жұмыстар байқауында университетіміздің жас ізденушілері бірнеше бағыт бойынша 4 жүлделі орынға ие болды. Әлеуметтік зерттеулерді ұйымдастыру, ұлттық бірегейлікті сақтау, «Мәңгілік Ел» патриоттық идеяның құндылықтары мен қазіргі жастардың бейнесіне қарасты жобалар бойынша жұмыстар қолға алынуда.
«Рухани жаңғыру» бағдарламасының негізгі ұстанымдарын білім алушыларға оқу үрдісі арқылы жеткізу үшін арнайы оқу бағдарламалары – элективті курстар даярланды.
Елбасы заманауи Қазақстанның азаматы қандай болуы қажет екенін айқындап берді. Біз жүргізген мониторинг нәтижесі жастардың «Рухани жаңғыру» бағдарламасын мақұлдап, қолдайтынын көрсетеді. Болашақта М.Өтемісов атындағы Батыс Қазақстан мемлекеттік университетінде де жоспарлы және кешенді жұмыс атқарыла бермек.
«Жаңа жағдайда жаңғыруға деген ішкі ұмтылыс – біздің дамуымыздың ең басты қағидасы» деген Елбасы мақаласы заман көшінен қалмай, әлем көз тіккен, дамыған озық елдер қатарынан орын алу үшін жаһандық бәсекеге қабілеттілікті арттырып, «өмір үшін өзгере білу керектігін, оған көнбегендер тарихтың шаңына ілесе алмайтынын» ұқтырғандай.
Нұрлан СЕРҒАЛИЕВ,
Махамбет Өтемісов атындағы Батыс Қазақстан мемлекеттік университетінің ректоры,
билология ғылымдарының кандидаты,
қауымдастырылған профессор
ОРАЛ
