Бұл теңдесі жоқ талдаудың әдіснамасы үлкен лингвистикалық деректерді зияткерлік машиналық өңдеу технологиясына негізделген. Зерттеу барысында соңғы жылы әлемнің 140 елінде 30 000 медиасында жарияланған 127 млн-ға жуық мәтін талданды.
Әлемнің түрлі елдерінің, құрлықтары мен мәдениеттерінің маңызды жаһандық сын-тегеуріндерді қабылдауына арналған үлкен лингвистикалық деректерді талдаудың бірегей цифрлы зерттеуінің бірінші нұсқасы мамыр айының ортасында ұсынылып, әлемнің 100 елінен келген белгілі тұлғалар Жаһандық сын-тегеуріндер саммиті форматында аталған мәселені талқылады. Шілдеде бірегей халықаралық зерттеу жұмыстары аяқталды.
Алға қойылған мақсатқа қол жеткізу үшін деректерді талдау екі кезеңде жүргізілді. Бірінші кезеңде бес топ: экономикалық, экологиялық, геосаяси, әлеуметтік және технологиялық 29 сын-тегеуріннің егжей-тегжейлі сипаттамасы жасалды. Бұл сипаттама бірқатар статистикалық көрсеткіштер негізінде әзірленді.
Зерттеу нәтижесіне сәйкес, құрлық-тардың, мега-аймақтардың және елдердің арасында жаһандық дамудың негізгі сын-тегеуріндерін қабылдауда айтарлықтай айырмашылықтың бар екені анықталды. Егер дамушы әлем елдері негізінен өзекті экономикалық және әлеуметтік проблемаларға баса көңіл бөлсе, дамыған елдердің ғаламшардың тұрақты дамуына қатысты мәселелерге көбірек алаңдайтыны анықталды. Цифрлы экономика заманында өмір сүріп жатқан кейбір елдер үшін ең маңызды қауіптердің қатарына киберқауіпсіздік мәселесі кірсе, өзге елдер үшін ең негізгі сын-тегеурін – жұмыссыздық мәселесі. Еуропа мен Солтүстік Американың күн тәртібіндегі аса өзекті мәселелер – жаппай көші-қон мен террористік қауіп болса, дамушы әлем елдері үшін базалық энергетика мен көлік инфрақұрылымының жетіспеуі аса маңызға ие.
Құрылымдық жағынан алғанда бұл талдау статистикалық көрсеткіштердің сипаттамасы және әлеуметтік-мәдени көзқарастар мен экономикалық жағдай тұрғысынан қалыптасқан мәселені түсіндіру ретінде саналады.
Қазақстан мемлекеттік қолдауға қажеттілігі және белгілі бір мақсаттарға қол жеткізу кезінде өз күш-жігерінің шешуші рөлі сипатталатын үшінші кластерге жатады. Әдетте, бұл кластердің өкілдері бәсекелестіктен гөрі, бірлескен әрекет ету тәсіліне бейім келеді. Қазақстан тұрғындары үшін елді дамытудың басым бағыты ретінде экономикалық өсімге және экономикалық жүйенің тұрақты жағдайына қол жеткізу маңызды. Гуманистік қағидалармен ашық қоғам құру да маңызды басымдықтардың қатарында. Елдің әскери әлеуетін дамыту да өзекті мәселелердің бірі.
Зерттеуге сәйкес, Қазақстан тұрғындарының өз еліне деген патриоттық көзқарасы өте жоғары деңгейде екені байқалады. Отансүйгіштік сезімімен және демократиялық құндылықтардың маңыздылығын мойындаумен қатар, қазақстандықтарға құндылық ретінде толеранттылық қасиеті де тән. Басқа дін мен ұлт өкілдеріне деген жоғарғы сенім деңгейі сақталған.
«Адамдарға зорлық-зомбылық көрсету жол берілмейтін қателік саналады. Жалпыланған сенім деңгейі орташадан біршама жоғары. Бұл қарым-қатынастың айрықша негізі ретінде адалдықты және риясыздықты анықтайды. Жалпы, ел тұрғындары үшін қоғамның демократиялық негіздерінің маңыздылығын мойындау өте маңызды», – делінген құжатта.
Сонымен бірге Қазақстан тұрғындарының Үкіметке, мемлекеттік құрылымдарға және сайлау жүйесіне қатынасы айқын сенімге негізделген. Сайлау процесінің негізгі элементтері (сайлау алдындағы науқан, бұқаралық ақпарат құралдарында жариялау, оппозициялық күштердің әрекеттеріне жағдай жасау, дауыстарды санау) заңды деп танылады.