Жиынға Денсаулық сақтау министрлігі Қоғамдық денсаулық сақтау комитетінің төрағасы –Бас мемлекеттік санитарлық дәрігер Жандарбек Бекшин, Білім және ғылым министрлігі Ғылым комитетінің «Ұлттық биотехнология орталығы» республикалық мемлекеттік кәсіпорны Алматы қалалық филиалының директоры Сейдіғапбар Мамадәлиев, Ауыл шаруашылығы министрлігі Ветеринарлық бақылау және қадағалау комитеті төрағасының орынбасары Тұрсын Қабдулданов, Инвестициялар және даму министрлігі Геология және жер қойнауын пайдалану комитеті төрағасының орынбасары Талғат Сәтиев қатысты.
Үкіметтің 2018 жылғы 13 сәуірдегі қаулысымен «Возрождение» аралының қазақстандық бөлігінде және Арал теңізіне іргелес құрлық аумағында эпидемиологиялық саламаттылықты қамтамасыз ету және мониторинг жүргізу жөніндегі 2018-2020 жылдарға арналған іс-шаралар жоспары бекітілген.
«Бүгінгі мәселе өте өзекті деп айтуға болады. Бұл еліміздің биологиялық қауіпсіздігі және қазіргі таңдағы «Возрождение» аралының жағдайы. Әрине бұл мәселеге қазір Үкімет тарапынан үлкен мән беріліп, назар аударылып жатыр. Мемлекеттік органдар да бұл мәселемен айналысып, үш жылға арналған жоспар дайындадық. Аталған жоспарды іске асыруға 11 мемлекеттік орган тартылған. Шаруашылық қажеттіліктерін және өнеркәсіптік өңдеулерді жүзеге асыруға қажетті жағдайларды қамтамасыз ету үшін аралдағы санитарлық-эпидемиологиялық жағдайды зерделеу қажет. Бұрын 2003-2005 жылдары Денсаулық сақтау министрлігінің М.Айқымбаев атындағы Қазақ каратиндік және зооноздық инфекциялар ғылыми орталығы (ҚКЗИҒО) аралда зерделеу жүргізді және 1802 топырақ сынамасын, 2101 жылы қанды жануарлар мен 8286 олардың эктопаразиттерін (бүрге мен кене) зерттеді. Зерттеу барысында «Возрождение» аралының қазақстандық бөлігінің эпидемиологиялық (инфекциялық) қаупі жоқ екендігі туралы нәтиже алынды», деді Бас мемлекеттік санитарлық дәрігер Жандарбек Бекшин.
«Возрождение» аралы Арал теңізінде, Өзбекстан және Қазақстан шекараларының аясында орналасқан. Оның аумағы шамамен 200 шаршы км, оның ішінде аралдың қазақстандық бөлігі – 70 шаршы км Қазақстан Республикасының Үкіметі тарапынан аралдың қазақстандық бөлігін шаруашылық қажеттіліктерге пайдалануға, сондай-ақ болашақта көмірсутек шикізаты кенін өңдеуге жарамдылығын зерделеуге қатысты тапсырма берілген.
«Жалпы жоспарды іске асыру бірқатар іс-шараларды қамтиды. Олар: мемлекеттік шекараның Қазақстан – Өзбекстан учаскесін шегендеу жұмыстарын аяқтау, геологиялық барлау, ауыл шаруашылығы және өзге де іс-шаралардың орындылығы мен көлемін айқындау, «Возрождение» аралының аумағына іргелес Арал маңы аудандарында болып жатқан өзгерістерді анықтау үшін олардағы аса қауіпті және зоонозды инфекциялардың табиғи ошақтарына мониторинг жүргізу, арал аумағын зерттеу бойынша ақпарат алуға бағытталған шет елдермен өзара іс-қимылды және консультацияларды қамтамасыз ету», деді ол.
Рауан ҚАЙДАР,
«Егемен Қазақстан»