Ағымдағы жылы еліміздің Кәсіподақтар федерациясы бастауыш кәсіподақ ұйымдарымен өзара байланысқа негізделген бірқатар ауқымды тәжірибелік іс-шаралар өткізуде. «Алакөл-2018» жазғы кәсіподақ лагері де федерацияның кәсіподақ жүйесі үшін осы жаздың басты оқиғаларының бірі деуге болды.
Жазғы лагерьде кәсіподақ қозғалысының 100-ден астам белсендісі арнайы оқудан өтті. Олардың ішінде жаңадан құрылған «SENIM» денсаулық сақтау қызметкерлерінің салалық кәсіподағы, білім және ғылым қызметкерлерінің салалық кәсіподағы, мәдениет, спорт және ақпарат қызметкерлерінің салалық кәсіподағының мүшелері болды.
Жазғы лагерь аясында Қазақстан Кәсіподақтар федерациясы төрағасының орынбасары Ерлан Саиров, «SENIM» денсаулық сақтау қызметкерлерінің салалық кәсіподақ төрағасы Сапарбек Дүйсенов, Шығыс Қазақстан облысы кәсіподақтар орталығының төрағасы Мейірхан Тілеубаев қатысушылар алдында сөз сөйледі.
Ерлан Саиров өз сөзінде Қазақстан кәсіподақтар федерациясының еліміздегі кәсіподақ ұйымдарының жұмыс сапасын жан-жақты дамытуды және жақсартуды көздейтінін жеткізді. «Кәсіподақтар қызметкерлері белсенді және жан-жақты білікті мамандар болуы тиіс. Белсенді ақпараттық жұмыс – кәсіподақтар қызметінің маңызды бөлігі. Шынында бұл маңыздылығы жағынан кәсіподақ жұмысының дәстүрлі бағыттарына тең келетін, жарғылық міндеттерді шешудің ажырамайтын бөлігі. Ақпараттық жұмыс кәсіподақ мүшесіне кәсіподаққа мүшелікке саналы көзқарасқа ие болуы үшін қажетті толық мәлімет беруі тиіс» деп атап өтті Кәсіподақтар федерациясы төрағасының орынбасары.
Атқарушы билік өкілдерінен Шығыс Қазақстан облысы әкімінің орынбасары Әсем Нүсіпова, Мемлекеттік еңбек инспекциясы басқармасының басшысы Бақытбек Қизатов сөз сөйледі.
«Кәсіподақтар әлеуметтік-еңбек қатынастарын шешудің маңызды буыны. Жұмысшылардың әл-ауқаты мен әлеуеті, олардың әлеуметтік кепілі мен құқығының қорғалуы тек кәсіподақтардың белсенділігіне байланысты», деді Ә.Нүсіпова.
Сондай-ақ қолданбалы ғылым секторының өкілдері де өз тәжірибелерімен бөлісті. Олардың арасында Academy of labour relations ЖШС бас директоры Бибігүл Нұрашева және басқа да ғалымдар бар.
«Алакөл-2018» жазғы лагері аясында тақырыптық тренингтер, тимбилдинг және басқа да шаралар ұйымдастырылды.
2018 жылдың басынан бастап Кәсіподақтар федерациясы бастауыш кәсіподақ ұйымдарымен өзара байланысқа және жұмыс жүргізуге баса назар аударуда. Себебі кәсіподақтар қозғалысының және жұмыс топтарының мәселелері мен сұраныстарының барлық спектрі бастауыш кәсіподақ ұйымдарында шоғырланған.
Биыл ҚРКФ басшылығы федерация қызметінің жаңа саясаты мен Жол картасының негізгі бағыттарын түсіндіру мақсатында еліміздің барлық өңіріне жұмыс сапарымен барды. 2018 жылғы қаңтар-шілде айларының аралығында бастауыш кәсіподақ ұйымдарымен 139 кездесу өтті.
Азамат ҚАСЫМ,
«Егемен Қазақстан»
Шығыс Қазақстан облысы
