Әрине, ерте көктемнен ала жазға дейін қолынан ай маңдай кетпені түспей, алқаптың ішінде дақылды жағадан алған арамшөптермен күресіп жүретін, мерзімінде суарылуын қадағалайтын диқан маңдай терінің ақталғандығы өте жақсы. Бұл базбіреулер ойлағандай бір маусым бел ауыртып пішен ақшаны қалтаға басатындай оңай тірлік емес. Оны шаруалар жақсы біледі. Бүгінде олар 500 гектар жерге егілген дақылдан кемінде 10 мың тонна өнім жинап алуды мақсат етіп отыр.
Әр өңірде сол аймақтың атын шығаратын брендтері болады. Мәселен, Қарағанды облысындағы Жаңаарқа ауданының қымызы ерек. Күбіні тобылғымен ыстап, піскен сайын қуаты артып, бетінде мейіздей-мейіздей болып қара қошқыл майы жүзіп жүретін Жаңаарқа қымызын сол ауылдағылар күнде ішіп жүрген соң байқамайтын шығар, ал сырттан келіп, алғаш рет дәмін татқан адам ауызының суы құрып аңыздай айтып жүреді. Негізінен жусанды, селеулі даланың шөбі асыл болса керек. Сол сияқты Жайылма қарбызының дәмі де өзгелерден тіл үйірер қасиетімен ерекшеленеді. Диқандардың қай дақылға болса да тыңайтқышты көп беретіндігі белгілі. Сондықтан да өнімдер табиғи қасиетін сақтай бермейді. Ал Жайылмада тыңайтқыштың орнына органикалық қорек беріледі. Бақша егістігі Қаратау іргесіндегі Жиделі су қоймасынан суарылады.
Әрине, ауыл шаруашылығы мемлекеттік жәрдемсіз күткен үдеге жеткізе бермейтіндігі белгілі. Диқандар «Ауыл шаруашылығын қолдау қоры» арқылы «Егінжай» бағдарламасымен жеңілдетілген несие алған. Техникалар жаңарып жатыр.
Жаңақорған ауданының әкімі Ғалым Әміреев мемлекеттік қолдаудың арқасында Жайылма қарбызын экспортқа шығуына мүмкіндік туып отырғанын айтады. Сапасы жоғары, бағасы қалтаға қонымды тауарды көрші мемлекеттерден де аттай қалап отырған саудагерлер жеткілікті көрінеді. Ресейдің Челябинск қаласынан келісімшарт арқылы тасымалдауға ниет білдіріп отырған кәсіпкерлер бар. Еліміздің солтүстік облыстарынан да «біз құр қалып кетпейік» деген базына айтылып жатқанға ұқсайды.
Аудан әкімі Қызылорда шаһарынан тек Жайылма қарбызы сатылатын нүктелер ашуға мүдделілік танытып отыр. Осылайша Жайылма қарбызы Қызылорданың мақтанышына айналды. Жартысы бал, жартысы шекер Сыр қауынына құрмет ертеден бар. Жаз қызығының базары осылай қайнап жатыр.
Бақтияр ТАЙЖАН,
«Егемен Қазақстан»
Қызылорда облысы