Ел ішіндегі еленбей жүрген өнер иесі мен қолы епті ісмерлердің және көшбасшы жастардың танылуына жол ашқан осы фестивальде ән шырқалып, күй тартылды. Отты жыр оқылып, фотосурет байқауы да өтті. Үздіктер анықталып, топжарғандар облыс әкімінің қолынан мақтау қағаз бен бағалы сыйлықтар алды. Осы күні «Jetisy Style» жастар фестиваліне жиналғандар ғана емес, жалпақ жетісулықтардың таңдайын қақтырған қолөнер иесінің атына қанық болдық.
Нұрлан Жартыбеков есімді жас жігіт нағыз тоқымашы екен. Ол – ілмектеп тоқудан әлем рекордын жаңартқан жерлесіміз. Қапшағай қаласындағы «Балдәурен» республикалық оқу-сауықтыру орталығында тоқыма пәнінен дәріс беретін Нұрлан ілмектеп тоқу өнері бойынша дүние жүзінің шеберлерін шаң қаптырыпты. Мысалға, қолыңыздағы тоқымаңызды көзіңізді жұмып отырып жасай аласыз ба? Мүмкін емес пе? Ал Нұрлан арнайы мамандардың алдында көзін тарс байлап алып рекорд жасаған. Ептілік пен сәттіліктің жарысында ол 1 минутта 56 рет ілмек тоқып, хас шеберлердің қасын кергізіпті. Әрі бұл жас тоқымашының жалғыз жетістігі емес. Жақында ғана Нұрлан жаңа рекорд жасады. Бұл жолғысы тіптен ғажап. Ілмектеп тоқудың шебері 72 сағат бойына тоқтамастан жұмыс істеп, иірілген жүннен шарф тоқып шықты. Тоқыған мойынорамасының ұзындығы 35 метрге жетті. Бұл – әлемдегі әйгілі тоқыма шеберлерінің өзі мұншалықты аз уақыт ішінде қол жеткізбеген жетістік екен.
Демек, 72 сағатта 35 метр түбіт бөкебай тоқыған Нұрлан Жартыбеков нағыз рекордшы емес пе? Тоқымашы жігіттің еңбегін ескерген Алматы облысының әкімі Амандық Баталов оған арнайы диплом мен статуетка сыйлады.
Қалмаханбет МҰҚАМЕТҚАЛИ,
«Егемен Қазақстан»
Алматы облысы
