Burabike – көпшілік спорт іс-шарасы, оның мақсаты – Қазақстанның балалар ауруханаларын өмірлік қажеттілігі бар медициналық жабдықтармен жарақтандыру үшін қаражат жинау. Алты жылдың ішінде Burabike қатысушылары мен қонақтары осы қайырымдылық шарасына 700 миллионға жуық теңге жұмсады. Бұл ретте осы жылы жиналған сома 205 миллион теңгені құрады.
Веложарысты Қазақстанның мәдениет және спорт министрі Арыстанбек Мұхамедиұлы мен Astana Pro Teaм командасының бас менеджері Александр Винокуров бастап берді. «Мен кезекті Burabike іс-шарасына қатысқаныма қуаныштымын, оның үстіне бұған қатысушылардың саны жылдан-жылға өсіп келеді, өйткені оның басты мақсаты – қайырымдылық. Astana Pro Teaм командасы үшін осы веложарысқа қатысу дәстүрге айналды», дейді Александр Винокуров.
«Біз 2018 Burabike веложарысына тіркеуді мерзімінен бұрын тоқтатуға мәжбүр болдық, өйткені бұған қатысуға тілек білдіргендердің бәрін тіркеуге іс жүзінде мүмкіншілігіміз болмады. Келесі жылғы мүмкіндікті қазірден бастап ойластырамыз. Burabike жыл өткен сайын көпшілікке танымал болып келеді және қайырымдылық шарасына тартылған қазақстандықтардың саны да арта түсуде», деп атап өтті Burabike қайырымдылық қорының іргетасын қалаушы Болат Өтемұратұлы.
Веложарыстан түскен қаражатқа Мерке ауданының (Жамбыл облысы) Орталық аудандық ауруханасына, Тимирязев орталық аудандық ауруханасына (СҚО), Панфилов ауылындағы перзентхана үйіне, Алакөл орталық аудандық ауруханасына (Алматы облысы) және Ақадыр қалашығындағы ауылдық ауруханаға (Қарағанды облысы) маңызды медициналық құрал-жабдықтар сатып алынады.
Әли БИТӨРЕ,
«Егемен Қазақстан»