Бұл заң жобасы денсаулық сақтау саласына Мемлекет басшысы мен Үкімет қойған басым міндеттерді орындау мақсатында әзірленгені айтылды. Министр тегін медициналық көмектің кепілдендірілген көлемі (ТМККК) мен Міндетті әлеуметтік медициналық сақтандырудың (МӘМС) жаңа моделі ДДҰ-ның халықты денсаулық сақтау қызметтерімен жаппай қамту жөніндегі принциптеріне сәйкес екендігін атап өтті. Мәселен, ТМККК шеңберінде амбулаториялық-емханалық қызмет көрсету мен стационарлық көмекті қоса алғанда, медициналық көмек барлық азаматтарға, оралмандарға және Қазақстанда тұрақты тұрып жатқан шетелдіктер мен азаматтығы жоқ адамдарға көрсетіледі. МӘМС жүйесіндегі медициналық көмек ТМККК тыс медициналық қызметтерді қамтиды. Сонымен бірге МӘМС көлемі ТМККК пакетімен салыстырғанда 42,4 мың теңгеге артық болады. Бұл халықтың МӘМС жүйесіне қатысуын айтарлықтай ынталандырмақ.
«Денсаулық сақтау саласындағы тиімді басқару мен бәсекелестікті дамытуды қамтамасыз ету мақсатында заң жобасында: 1) шаруашылық жүргізу құқығындағы мемлекеттік кәсіпорындардағы қадағалау кеңестерінің өкілеттігін кеңейту; 2) шаруашылық жүргізу құқығындағы мемлекеттік кәсіпорындарда алқалық атқарушы органдар енгізу; 3) шаруашылық жүргізу құқығындағы мемлекеттік кәсіпорындарда ішкі аудит қызметін енгізу көзделеді», – деді министр. Сонымен қатар заң жобасында ДСМ-ге денсаулық сақтау инфрақұрылымын дамытудың бірыңғай перспективалық жоспарын қалыптастыру қағидаларын әзірлеу және бекіту бойынша және ЖАО-ға ДСМ-нің келісімі бойынша денсаулық сақтау инфрақұрылымын дамытудың перспективалық жоспарларын бекіту бойынша өкілеттіктер берудің көзделетіні аталды. Осы нормаларды іске асыру нәтижесінде: 1) мемлекеттік инвестицияларды жоспарлауды оңтайландыру; 2) аурухана ұйымдарының шығындарын оңтайландыру; 3) медициналық көмекті интеграциялау; 3) жеке бизнес үшін инфрақұрылымды дамытуға қатысудың тартымдылығын арттыру күтіледі. Осылайша, МӘМС енгізу жағдайында медициналық көмек көрсету сапасы, денсаулық сақтау жүйесінің экономикалық тиімділігі мен бәсекеге қабілеттігі артады. «Медициналық білім мен ғылым жүйесін жетілдіру мақсатында, сондай-ақ «Денсаулық» мемлекеттік бағдарламасында көзделген міндеттерді шешу үшін заң жобасында медициналық білім мен ғылым саласындағы стратегиялық әріптестік институты енгізіледі; медицинадағы ғылыми қызмет жетілдіріледі; денсаулық сақтау саласындағы білім мен ғылым ұйымдарының ғылыми-педагогикалық кадрларының құзыретін бағалау жүйесі енгізіледі, сондай-ақ Назарбаев университетке ұқсас интеграциялаған академиялық медициналық орталықтар мен университеттік клиникалар құру механизмі арқылы ғылым, практика мен білімнің үштұғырлығы үшін жағдай жасау көзделеді», – делінді баяндамада. Өзінің сөзін түйіндей келе Елжан Біртанов осы заң жобасы донор институтын және туберкулезбен ауыратындарға медициналық көмек көрсетуді, МӘМС-ті одан әрі жетілдіруді; денсаулық сақтаудың ұлттық шоттарын енгізуді және т.б. қамтып, қолданыстағы заңнамадағы денсаулық сақтау жүйесі мәселелері бойынша олқылықтарды түзетуге бағытталатынын айтты.
Депутаттар Г.Ихсанова, К.Мұсырман, Т.Сыздықов және т.б. министрге сұрақ қойып, заң жобасында қамтылған мәселелерді анықтады. Соның ішінде ауылдық, аудандық жерлердегі медицина ұйымдарын кадрлармен жабдықтау мәселесі көп сұралды. Министр бұл мәселенің заң жобасында қамтылып, медициналық университетті бітірген жастардың үш жылға жіберген орындарға барып, практикалық жұмыстар жасайтыны туралы заң жобасында арнайы бап қарастырылғанын жеткізді.
Жақсыбай САМРАТ,
«Егемен Қазақстан»