«Astana Media Week» – дәстүрлі түрде жыл сайын еліміздің Ақпарат және коммуникациялар министрлігі ұйымдастыратын Орталық Азия аймағындағы кең ауқымды салалық іс-шаралар сериясы. Шараның негізгі мақсаты – отандық медиасфераны дамытып, медиаиндустриямыздағы іскерлік қарым-қатынастарды жандандыру. Медиа апталыққа қатысушылар қатары арта түскені биыл анық байқалды. Себебі мұнда бірнеше елдің журналистика майталмандары тәжірибесімен бөлісіп, медианарықты дамытуға қатысты ортақ мәселелерді кеңінен талқылайды. Бір-бірімен байланыстарын нығайтып, сапалы өнімдерімен алмасады. Үш күн ішінде еліміздің айтулы медиа шарасы аясында қатысушылар коммуникация, медиа-менеджмент және әлеуметтік желілер бойынша өтетін шеберлік сыныптарына қатысып, өздеріне қажетті мол ақпаратпен сусындайтын болады.
Былтырғы «Astana Media Week» шеңберінде елімізде алғаш рет контент-маркет өткізілген болатын. Биыл да сол дәстүрден жаңылмай, ашылған контент-маркет көрмесінде отандық және аймақтық 15 телеарнаның таныстырылым стенді орнатылып, көпшілік назарына ұсынылды. Сонымен бірге контент-маркет көрмесіне еліміздің барлық өңірлерінен продакшн-компаниялар мен жетекші вендингтік компаниялар қатысып, олар жаңа телебағдарламалардың, реалити-шоулардың, мультфильмдердің, көркем фильмдер мен деректі фильмдердің тұсаукесері ретінде, инвесторлар табу мақсатында өз жобасын таныстыру үшін питчинг өткізді. Яғни көрме аясында қазақстандық продакшн-студиялар өз өнімдеріне инвестор табу мақсатында белсенді жұмыс атқаруға, өз медиа өнімдерін шетелге шығаруға мүмкіндік алды.
Себебі медиа-апталық қызметіне Беларусь, Ресей, Түркия және Өзбекстан өкілдері қатысуда. Продакшн-компаниялар мен PR қауымдастықтардан арнайы қатысып жатқандар отандық медианарық өкілдерінің шығармашылығына қызығушылық танытса, өз кезегінде біздің азаматтар шетелдік медиа сферамен байланысты жаңа деңгейге көтеруге ынталанары анық. Мәселен, форум аясында «Қазақстан» РТРК» АҚ мен құрамына Өзбекстанның 20-дан астам үздік арналары кіретін Өзбек Ұлттық телерадиокомпаниясы арасында серіктестік жайлы меморандум бекітілді. Меморандум «Қазақстан» корпорациясының медиаактивтері мен Өзбекстанның 20-дан аса телеарналары және радиолары арасында еркін форматта бірлесе отырып, жұмыс жасауға мүмкіндік береді.
«Astana Media Week» шарасы бұқаралық ақпарат құралдарын, яғни тек қалам ұстаған қауымды жинап жатқан жоқ. Аталған шара медиа саласындағы, ақпарат нарығындағы өнім шығаруға атсалысатын түрлі мамандар мен билік өкілдерін тоғыстыруда.
Қазақстанның цифрлы сауаттылық пен байланыс сапасын көтеру бағытында жүргізіп жатқан жұмыстары соңғы уақытта жаңаша өріс алғаны белгілі. Бұл ақпарат тұтынушыларының талғамына ұсынылатын медиа өнімнің сапасын арттыруға міндеттейді. Түптеп келгенде, таңдаудың молдығы халықтың осылайша өзі қалайтын ақпараттарды таңдап, ой-өрісін кеңейтетіні ақиқат. Заманауи контенттердің көптігі тұтынушы санасының жаңғыруына көмектессе, отандық продакшн-компанияларға медиаиндустрия алыптарымен тікелей қарым-қатынас жасап, инвесторлар тартуына зор мүмкіндік береді. Міне, «Astana Media Week»-тің көздеп отырған негізгі мақсаттарының бірі осы.
«Қазмедиада» басталған ірі медиа шараның ашылу салтанатына Ақпарат және коммуникациялар министрі Дәурен Абаев шетелдік әріптестері Өзбек Ұлттық телерадиокешенінің төрағасы Әлішер Хаджаев пен Түркия радио және телевизия корпорациясы басқарма төрағасының орынбасары Мехмет Йылдырым, Беларусь Ақпарат министрінің бірінші орынбасары Павел Легкиймен бірге қатысты.
Алдымен Ақпарат және коммуникациялар министрі Дәурен Абаев сөз алып, аймақтық ірі медиа-апталықты салтанатты түрде ашты. «Елбасы Нұрсұлтан Назарбаев отандық медиа саланы дамытуға әрдайым айрықша көңіл бөліп отырады. Осымен екінші рет өтіп жатқан ауқымы кең шара еліміздің ғана емес, аймақтағы медианарықты қалыптастыруға, одан әрі дамытуға серпін береді деп сенемін. Өйткені елорда төрінде қазақстандық бұқаралық ақпарат құралдарынан бөлек, шетелдік әріптестеріміз де өз ойларын ортаға салады. Бұл шараның басты мақсаты – отандық медианарықты жан-жақты дамыту, мәдени-ақпараттық байланыстарды тереңдету. Байланысы мықты мемлекеттің қорғанысы да қуатты», деген Дәурен Абаев медиа-апталыққа қатысуға ниет білдіруші әріптестердің қатары көбейіп келе жатқанын жеткізді.
Озық тәжірибелермен танысу, пікір алмасу, шығармашылық шеберліктерін шыңдауға, жаңа технологияларды ел игілігіне жарату туралы ұсыныстар медиа-апталыққа қатысушылар үшін үлкен мүмкіндік екеніне басымдық бере сөйлеген министр, шараның медиа саласының кәсіби майталмандарын жинап, қоғамдағы мәселелердің кең ауқымын талқылайтын конструктивті сұқбат алаңы екеніне тоқталды.
«Бүгінде бұқаралық коммуникация саласы – қоғамдық дамудың маңызды құрамдас бөлігінің бірі. Осы орайда, сіздердің тың, жаңа ойларыңыз, идеяларыңыз ақпараттық ландшафтты өзгертіп қана қоймай, саясат пен қаржы, ауыл шаруашылығы мен спортқа дейінгі аралықтағы түрлі салалардағы процестерге жаңа серпін береді. Осы тұрғыдан алғанда, өзекті мәселелерді кең талқыға салу маңыздылығы арта түседі. Себебі сол арқылы нақты қалай, қандай бағытта жұмыс істеу керектігінің алгоритмі түзіледі. Осы мақсатта медиа-апталық журналистер мен билік өкілдерін ғана жинамай, PR қауымдастықтар мен шетелдік сарапшы мамандардың басын біріктіріп отыр. Форум жергілікті БАҚ өкілдеріне де тәжірибе алмасу және шеберлігін шыңдау үшін таптырмас тиімді алаңға айналып отыр», деді министр.
Бұдан соң Ақпарат және коммуникациялар министрі шетелдік әріптестерімен бірге отандық продакшн-компаниялар мен телеарналар ұсынған контент-маркетті аралап, отандық таныстырылым стендтерін тамашалады.
Үш күндік шараның жұмысына 2 мыңнан аса қонақ қатысады деп күтілуде. Олардың қатарында жергілікті және шетелдік медиаиндустрияның алпыстан астам топ-менеджері, яғни басшылары мен елуге жуық продакшн-компания өкілдері бар. Медиа-апталықтың үш күндік бағдарламасы тізімінде контент-маркет көрмесінен басқа, аймақтық БАҚ-тар форумын, Astana Digital Forum шарасын өткізу жоспары бар. Онда медиа саласындағы өзекті тақырыптар талқыланады. Мәселен, отандық медианарықты дамыту, келешектің мамандығы, медиа сауаттылық және білім мәселелері көтеріледі.
Ал ертең еліміздің түкпір-түкпірінен келген журналистер елордаға жиналмақ. Олар «Astana Media Week» шеңберінде Өңірлік БАҚ альянсы ұйымдастыратын аймақтық БАҚ өкілдерінің форумына қатысатын болады. Форум бағдарламасына сәйкес масс-медиа жұмысына қатысты заңнамаларды өзгерту, медиа сауаттылықты дамыту, медианы сандық трансформациялау тақырыптарына арналған бірнеше сессиялар бар.
Медиа-апталықтың соңғы күні де пайдалы шараларға толы болмақ. Ақпарат және коммуникациялар министрлігі Өңірлік БАҚ альянсымен бірге орталық және жергілікті мемлекеттік органдардың баспасөз қызметі қызметкерлері мен түрлі саладағы журналистер үшін семинарлар өткізбек. Онда баспасөз қызметтерінің өкілдеріне БАҚ-пен тиімді жұмыс жүргізудің, медиа жұмысының ажырамас бөлігі SMM-ді (Social media Marketing) жүргізудің қыр-сыры үйретілетін болады. Сонымен бірге, сарапшылар іскерлік байланыс орнатудың маңыздылығы мен медиа жоспарлау тиімділігін, заманауи медиа трендтер жайын талқылап, стратегиялық ойлауды дамыту құпияларымен бөліспек.
«Astana Media Week»-тің алғашқы күні медиа-контентке тапсырыс беруші ірі телевизиялық және радио-компаниялар мен медиаөндіріс нарығындағы жеке компаниялар, продакшн-студиялар мен шығармашылық ұжымдар, продюсерлік орталықтар және медиаөнімдер ұсынатын түрлі ұйымдар арасында іскерлік байланыстар орнатуға арналды. Яғни шара отандық медиаөнімді өндіру, сату-сатып алу, шығармашылық идеялармен алмасудың қайнаған ортасына айналды. Медиа-апталықтың алғашқы күні қонақтар қатарында болған, ұлттық брендке айналып үлгерген бүркітші қыз Айшолпан, «Томирис» кинофильміне түскен Альмира Тұрсын және басқалар шетелдік қонақтарға мақтанышпен көрсететін отандық медианың жаңа келбетін көрсетті.
Ауқымды шара еліміздің аймақтарындағы байланыстың жаңа бағытта дамуына, бизнес әлеміндегі әріптестерімен тиімді іскерлік байланыстар орнатуға және отандық медиа саласының шетелдік серіктестермен халықаралық ынтымақтастығын нығайтуға септігін тигізері анық.
Венера ТҮГЕЛБАЙ,
«Егемен Қазақстан»