Отырысты ашқан Г.Әбдіқалықова сыбайлас жемқорлыққа қарсы іс-әрекет Қазақстанда мемлекеттік саясаттың маңызды стратегиялық басымдығы ретінде қарастырылатынын атап өтті. Елбасы Нұрсұлтан Назарбаев өзінің Қазақстан халқына арнаған қаңтардағы Жолдауында сыбайлас жемқорлықтың алдын алу жолындағы күресті жалғастыру қажеттігін айтқанына да тоқталды.
«Бүгінгі жиын селекторлық форматта өтеді. Іс-шараға Алматы, Астана, Шымкент қалаларының және облыстардың басшылары, сонымен қатар өңірлік комиссиялардың мүшелері қатысып отыр. Өздеріңізге белгілі, Елбасы Нұрсұлтан Назарбаев барлық салаларда сыбайлас жемқорлықпен күрестің тиімділігін арттырудың маңыздылығына және тиісті алдын алу шараларын жүргізу қажеттігіне баса назар аударып отыр», деді Мемлекеттік хатшы.
Отырыста жер қатынастары саласында заңдылықты сақтау мәселелері, білім беру ісіне бюджет қаражатын тиімді пайдалануды қамтамасыз етуі бағытында қабылданып жатқан шаралар талқыланды. Жиын барысында Бас прокуратураның, Мемлекеттік қызмет істері және сыбайлас жемқорлыққа қарсы іс-қимыл агенттігінің, Республикалық бюджеттің атқарылуын бақылау жөніндегі Есеп комитетінің, Ауыл шаруашылығы, Білім және ғылым министрліктерінің баяндамалары тыңдалды.
Жер қатынастары сыбайлас жемқорлық белең алған саланың бірі екені белгілі болып отыр. Тек соңғы 2,5 жылдың ішінде бұл сала бойынша сыбайлас жемқорлыққа қарсы қызмет 457 қылмысты тіркеген. 78 адам сотталған. Прокурорлық тексеріс нәтижесі бойынша жерге қатысты заңнаманы қолдану саласында 342 адам, оның 24-і мемлекеттік қызметтің беделіне нұқсан келтіргені үшін түрлі жауапкершілікке тартылған.
Осы орайда отырыс барысында жер туралы заңнаманы, жеке баспана құрылысы үшін жер беру кезінде кезекті және мемлекеттік қызметтер көрсету мерзімдерін сақтау, коммерциялық жерлерді бәссаудасыз иеленуге жол бермеу қажеттігіне мүдделі мемлекеттік органдардың назары аударылды.
Білім саласында 2016 жылдан бері сыбайлас жемқорлық сипаттағы 510 қылмыс тіркеліп, оларға қатысты 178 адам сотталған. Әлеуметтік сауалнамалар жоғары оқу орындарындағы білім беруде, мектепке дейінгі мекемелермен балаларды қамтуда сыбайлас жемқорлық деңгейі жоғары екенін көрсеткен.
Талқылау нәтижесінде комиссия тарапынан өкілетті мемлекеттік органдарға анықталған заң бұзу жайттарына қатысты талдау жүргізіп, олардың алдын алу үшін тиісті тетіктер әзірлеу арқылы шаралар қабылдау жөнінде тапсырма берілді.
Жиын соңында Г.Әбдіқалықова сыбайлас жемқорлықсыз құқықтық мемлекет құру бағытында елде жүргізіліп жатқан реформалар Қазақстанның 2025 жылға дейінгі стратегиялық даму жоспарының басты міндеттері – жедел әрі сапалы экономикалық өсім мен елдегі халық тұрмысы деңгейінің жоғарылауына қол жеткізуге бағытталуға тиіс екенін атап өтті.
Абай АСАНКЕЛДІҰЛЫ,
«Егемен Қазақстан»
