Қуантарлығы сол, «Достық үйінде» өткен шараға өзге ұлт өкілдері де қатысып, тәп-тәуір нәтиже көрсетті. Ашық диктантты ұйымдастырудағы басты мақсаттардың бірі де осы еді. Диктантты оқу-тексеру жұмыстарын жаңадан құрылған «Ресурстық тіл орталығы» мекемесінің білікті мамандары атқарды.
Аталған мекеменің әдіскері Жансая Мұхаметжанова диктант мәтінін оқып, тақырыппен таныстырса, меңгеруші Жұпар Жақанова қатысушылардың сауатты жазуын тексеріп, ашық диктантқа қазылық етті.
«Қоғамдық келісім» мекемесінің директоры Ерлан Құсайын Қазақстан халқы Ассамблеясының 2025 жылға дейінгі даму тұжырымдамасын жүзеге асыру мақсатында бірнеше жылдан бері «Мың бала» республикалық мәдени-ағарту жобасының ұйымдастырылып келе жатқанын атап өтті. Мемлекеттік тілдің қолданыс аясын кеңейту мақсатында мұндай шаралардың көптеп ұйымдастырылып жатқанын да тілге тиек етті.
Диктант жазу ісіне этномәдени бірлестіктерден бөлек мемлекеттік және азаматтық қызметшілер, студенттер, мектеп оқушылары, қоғам қайраткерлері, сондай-ақ ниет білдірген тұрғындардың барлығы атсалысты.
Осы күні ашық диктант «Достық үйімен» қатар облысымыздың басқа да қалалары мен аудандарындағы кітапханаларда, оқу орындары мен мектептерде де ұйымдастырылды.
«Қоғамдық келісім» мекемесі алдағы уақытта латын әліпбиі бойынша да ашық диктант ұйымдастырылатынын жоспарлап отыр.
Ерболат ҚУАТБЕК,
«Ресурстық тіл орталығы» мекемесінің инспекторы
ҚАРАҒАНДЫ