Ресей экспорт орталығының халықаралық жобалар бойынша директоры Андрей Архипов мұндай іс-шаралар жеңіл өнеркәсіп саласындағы екіжақты сауда қарым-қатынастарын дамытудың ықпалды механизмі екенін атап өтті. «Бүгінгі шараға Қазақстан нарығына қатысты нақты жоспары бар 25 компания өкілдері шақырылған. Тұтынушылар қатары физикалық тұлға болғанымен, жұмыс істеуде нарықтың өз заңдылықтары бар екені белгілі. Осыған орай шағын және орта кәсіпкерлікке байланысты әзірленген нақтылы жоспарымызды ұсынып отырмыз. Шараға дайындық барысында өзара қызығушылық танытқан тараптар арасында келіссөздер жүргізілді», деді Андрей Архипов.
Іскерлік келіссөздер барысында Қазақстандық өндірушілер ресейлік әріптестерімен тәжірибе алмастыру арқылы тауарлардың кеңінен таралу мәселелерін талқылады. Kogel сән үйінің сату бойынша директоры Инга Файзуллаева мұндай шаралардың тұтыну нарығын дамытуда маңызы зор екендігін айтады.
– Қазақстандық әріптестерімізбен достық, іскерлік байланыстарды дамытып жатқанымыз үшін өте қуаныштымыз. Біздің сән үйі кез келген уақытта ыңғайлылық пен жайлылықты бірінші орынға қояды. Үлкен мегаполисте таңертең үйден не киіп шығатының маңызды. Осыған орай біздің топтамамызда таңертең офиске, кешкісін мейрамханаға киіп баруға болатын көп функциялы киімдер бар. Ең бастысы қарапайым болса да көз тартарлық сәнді болуы маңызды. Қазақ қыздары өте сұлу. Біздің топтамамыз қазақстандықтардың ұлттық ұяң мінезіне дәл келетін сияқты, – деген ол күзгі трендте сұр, қара, қаракөк, ақ сынды классикалық түстерге басымдық бергенді жөн санайды.
Іс-шараны ұйымдастыруға Ресей Экспорт орталығы мемлекеттік институты, Астана әкімдігі, Астана қаласының кәсіпкерлер палатасы және «Астана Конвеншн Бюросы» ЖШС қолдау көрсетіп отыр.
Ая ӨМІРТАЙ,
«Егемен Қазақстан»