Елбасының биылғы Жолдауы соңғы уақыттарда қоғамда ең көп талқыланып жүрген мәселелерді қозғап қана қоймай, оларды шешудің нақты жолдарын ұсынуымен маңызды. Соның ішінде құқық қорғау органдарын жаңғырту туралы тапсырмасы көпшілік көңілінен шыққан мәселенің бірі болды деп ойлаймын.
Жалпы, Мемлекет басшысы еліміздің құқық қорғау жүйесін жаңғыртуды жіті назарда ұстап келе жатқаны белгілі. Яғни, саланың жаңғыруы кешелі-бүгін емес, ілгеріде басталған реформалар жүзеге асты. Мәселен, 2011 жылы Ішкі істер министрлігінің міндетіне кірмейтін кейбір медициналық, халыққа қызмет ету орталықтары және басқа да қызмет түрлерін Әділет және Денсаулық сақтау министрліктерінің құзыретіне берген еді. Бұл жұмыстар тізбегі әлі де жалғасуда.
Екінші бір айта кететін жайт, ішкі істер құрылымының өзгертілуі. Жолдауда Президент ерекше тоқталып өткен тағы бір мәселе – полиция қызметкерінің стандарты және оның жұмысының тиімділігін бағалау. Олардың лауазымын өсіру, аттестациядан өткізу және басқалары бұл саладағы ілгерілеушіліктерге негіз болуы тиіс.
Кезекті Жолдаудың қазақстандықтардың әл-ауқатын өсіруге бағытталғанына тағы бір мәрте куә болдық. Онда азаматтарымыздың әл-ауқатын, табысын қорғау үшін қауіпсіздік саласына да ерекше мән берілді. Ал қауіпсіздік полиция қызметкерінің кәсіби деңгейіне байланысты екені ақиқат. Сол себепті Елбасы полиция қызметкерінің деңгейін өсіруге мән беру арқылы, қоғамдағы өзекті мәселені дөп басып отыр. Мұның барлығы қоғамдағы әрбір мәселе, оны шешу жолдары әрдайым Елбасының назарында екенін байқатады.
Алуа ЖОЛДЫБАЛИНА,
Қазақстан Республикасы Президенті жанындағы стратегиялық зерттеулер институтының бөлім басшысы