Ғаламтордың жастарымызға пайдасы мен зияны қатар тиюде. Қазіргі таңда ғаламторға тәуелділіктің салдарынан адамдардың денсаулығы ғана емес, ойлау, сөйлеу, тіпті жазу мәдениеті де төмендеп барады. Әлеуметтік желіні кім қалай пайдаланамын десе, өз еркі. Оған ешкім шектеу қоя алмайды. Әйтсе де жастарымыз интернеттің жақсы тұсын тиімді пайдаланғаны дұрыс.
Жуырда С.Жиенбаев атындағы облыстық жасөспірімдер кітапханасында «Интернетсіз бір күн» акциясы өтті. Шараның мақсаты – жастардың денсаулығына зиян келтіретін ақпараттардан, насихат пен үгіттің теріс ықпалынан қорғауға атсалысу. Сонымен бірге кітап оқуға үндеу, кітапхана жанынан ашылған үйірме, клубтармен таныстыру. Жастардың бос уақытын интернетсіз тиімді өткізуге баулу.
Шараны Ақтөбе облысының мәдениет, архивтер және құжаттама басқармасының бас маманы Гүлжан Мейірханқызы ашып берді. Сонымен қатар «ISMER» этномәдени қолөнер үйірмесінің тұсаукесері өтті. Сөз сөйлеген қонақтар интернеттің қазіргі заманға сай тиімді байланыс құралы болғанымен, оның да зиянды тұстары бар екендігін айтып, жастарды кітап оқуға, бос уақыттарын тиімді пайдалануы үшін кітапхана клубтарына, үйірмеге жазылуға шақырды. Шараға Ақтөбе облысының үкіметтік емес ұйымдар қауымдастығының, бұқаралық ақпарат құралдарының өкілдері, №16 мектеп оқушылары, клуб мүшелері қатысты. Кітапханашылар тек кітаппен қамтамасыз етіп қоймай, әртүрлі клубтарға жетекшілік етеді. Жасөспірімдердің бос уақытын тиімді пайдалануына көмектеседі. Акцияға кітапхананың «Ақ қауырсын», «Шапағат», «Алтын өлке», «Бүркіт», «Сырғалым», «Старт» клубтарының мүшелері қатысты. Әр клуб мүшелері өздеріне берілген тапсырманы орындады. Инна Горобец «Родина моя Казахстан», Игорь Котлобовский «Вот голубой как небо флаг», Аманшиева Томирис «Казахстан – это имя страны» өлеңдерін оқыса, ал Манат Закеев «Қазақ елі» әнін орындады.
Гүлжан ЕСКЕНДІРҚЫЗЫ,
С.Жиенбаев атындағы облыстық жасөспірімдер кітапханасының қызметкері
АҚТӨБЕ
