Аймақ басшысы стратегиялық құжатта әлеуметтік-экономикалық мәселелер жан-жақты қамтылғанын, ел тұрғындарының өмір сапасын жақсарту басты басымдық ретінде айқындалғанын, алға қойған міндеттерді жүзеге асыруға барлық мүмкіндіктер қарастырылғанын жеткізе келіп, жергілікті жерлерде атқарылатын шараларға тоқталды. Елбасы тапсырмаларының ішінде жаһандық бәсекелестікке қабілеттілікті одан әрі қамтамасыз ете отырып, экспортқа бағытталған экономиканы қалыптастыру өте маңызды. Бұл орайда облыс агроөнеркәсіп кешенінің әлеуетін толық іске қосудың мәні зор. Негізгі міндет – еңбек өнімділігін және қайта өңделген ауыл шаруашылығы өнімінің экспортын 2020 жылға қарай 2,5 есе көбейтуге лайықты үлес қосу.
Ірі серпінді жобалардың мемлекет тарапынан қолдау табуы арқасында аграршылар озық технологияларды кеңінен қолданып келеді. Биылғы күзгі орақ науқаны ұйымшылдықпен атқарылып, гектар берекелігі 18 центнерден айналды. «Бабық-Бұрлық», «Зенченко және К», «Шағала-Агро» секілді серіктестіктер әр гектардан 40-28 центнер өнім жинай білді. Астық өндірісін әртараптандыру, цифрлық жүйені енгізу бағытында арнайы бағдарламалар жұмыс істейді.
Баяндамашы жер қатынастары саласында шешімін табатын мәселелерге назар аударып, соңғы үш жылда мақсатсыз пайдаланылған 1,3 миллион гектар жер телімінің қайтарылғанын, одан 1 миллион гектары ауылшаруашылық айналымына қосылғанын жеткізді. Өкініштісі сол, «Богви», «Транс Авто» секілді алпауыт компаниялардың әлеуметтік жауапкершілігінің төмендеп кеткені соншалық, жылдар бойы пай үлестерін бермеуді, жалақы төлемеуді әдетке айналдырған. Өнімділік кеміп кеткен. Жұмысшы-қызметкерлердің өмір сүру деңгейі оларды қызықтырмайтын секілді.
Жолдау талаптарының бірі – шағын және орта бизнеске, экспорттаушыларға қолдау көрсету, қайта өңдеу секторына басымдық беру, халық тұтынатын тауарлардың ауқымын көбейту, ішкі нарықты отандық өнімдермен толықтыру екенін атап көрсеткен баяндамашы бұл бағыттар бойынша атқарылатын істердің жай-жапсарын әңгімеледі.
Биыл 3400 бас сиырға лайықталған 8 миллиард теңгенің 7 жобасы іске қосылады. Сонда жылына 17 мың тонна сүт өндіруге қосымша мүмкіндік береді. Екі ет өңдейтін кешен, құс фабрикасы пайдалануға беріледі. 8 айда 70 миллиард теңгенің ауылшаруашылық өнімдері тереңдетіп өңделді. Экспорт 1,2 есеге ұлғайып, импорт 10,3 процентке азайған.
Жиынға қатысушылар жергілікті бюджет есебінен жеңілдетілген ипотека бойынша алғашқы жарнаны субсидиялауға 200 миллион теңге бөлінетіні, бірінші кезекте бюджет саласы қызметкерлері қамтылатыны туралы жаңалықты қуанышпен қабылдады. Мұның өзі «7-20-25» тұрғын үй бағдарламасына қатысушылар үшін қолжетімділікті арттыра түсері сөзсіз. Алқалы басқосуда 43 мың солтүстікқазақстандықтың, оның ішінде 300 учаскелік дәрігер мен 750 мейірбикенің жалақысы өсетіні, облыс орталығында 1500 орындық 2 білім үйі салынып жатқаны, 120 мектептің жөнделетіні, 4 мың компьютер орнатылатыны айтылды. Сонымен қатар келесі жылы 1500 пәтерлік 12 көп қабатты тұрғын үй бой көтеретіні, медицина мекемелеріне 2,8 миллиард теңгенің жаңа қондырғылары сатып алынатыны, орталық су жүйесіне 29 елді мекеннің қосылатыны, мұның бәрі тұрғындардың сапалы өмір сүру деңгейіне қолайлы жағдайлар жасайтыны да аталып өтті.
Өмір ЕСҚАЛИ,
«Егемен Қазақстан»
Солтүстік Қазақстан облысы
