Құдайым-ау, жаратқан иеміз де Құран Кәрімде: «Адам баласын ең көркем мүсінде жараттым», дейді. Расында, біздің түр-тұлғамыз бен тік жүруіміз жер бетіндегі өзге тіршілік иелеріне қарағанда сымбатты екені айдан анық. Тәңірден асқан суретші жоқ болса да, жасанды сұлулыққа деген талас енді толастамайды.
Сонымен қазіргі таңда Қазақстанда ең көп таралған пластикалық ота түрлері – блефаропластика, екінші орында – омырау үлкейту тұр. Үшінші, төртінші орындарға smas-лифтинг пен липосакция таласады. Демек әйелдердің талғамы өзгере бастады. Біраз жыл бұрын ғана қыз-келіншектер бірінші кезекте маммопластиканы көбірек таңдап келген. Ал бөксе үлкейту – глютеопластикаға біздікілер қазір көп жүгіне бермейтін көрінеді. Есесіне еуропалық пішінмен қабақ кестіруге әуестер көбейді.
Осыдан бірнеше жыл бұрын ғана әлемде жылына 18 миллионға дейін пластикалық операция, оның ішінде 10 миллионнан астамы хирургиялық жолмен жасалынатыны жарияланған-ды. Егер қыз-келіншектердің көпшілігі әрі жас әрі әдемі көрінудің жолында пышаққа түскенін барынша жасырып бағатындығын ескерсек, бұл көрсеткішке аса сене беруге болмас.
Сол сияқты пластикалық хирургтің қызметіне жүгінген әлемге танымал өнер жұлдыздары мен әлеуметтік желінің сұлулары бұл істің базарын жүргізіп тұр. Есесіне осы операцияның кесірінен сиқы қашқан танымал тұлғалардың рейтингі ешкімді қорқытпайды. Сұлулық – құрбандықты қалайды дейтін қайтпас қағидаттың салдары әлі әдемілік қуғандарды шошытып отырған жоқ.
Пластикалық хирургтер бет мүшелері бөлек-бөлек қартаймайтындықтан, кешенді түрде оны пышақпен кесіп-пішеді. Олар үлкен тәуекелге бара отырып, нәтижесі үшін түпкілікті кепілдікті ешқашан берген емес. Ал табиғаттың бір- бірімен мінсіз жалғастырып тұрған тіндері мен жасушаларын, көзге көрінбес қан тамырлары мен жүйке талшықтарын қию – денсаулыққа зиянын бәрібір тигізбей қоймайтынын медициналық білімі жоқ адам да ішкі түйсікпен сезеді...
Алайда осының біріне қарамастан, жасанды сұлулық салтанат құрып тұр.
– Қазіргі үрдіс пен тәжірибе бізге қазақ қыздарының еуропалықтарға еліктейтінін көрсетеді. Кореядағы сияқты бізге жастарымыз жұлдыздардың неше түрлі суреттерін алып келеді. Олардың арасында Instagram парақшалардан алынған бикештер, яки модельдер де бар. Бұлардың бәрі классикалық еуропалық қас-қабақ, бақырайған көз, жабысқан жақ, томпақ, дүрдиген ерін, сопақ бет болып келеді. Мұндай жағдайда біз клиенттерге аса қажеттілік болмаса, Құдайдың берген келбетінен бас тартпауға кеңес беріп бағамыз. Бірақ дегенінен қайтпайтындар бәрібір хирург пышағынан қорықпайды. Мәселен, липосакцияны алайық, бұл операция – артық майларды азайтқанымен, бәрібір арықтадың дегенді білдірмейді. Липосакциядан арықтаған әйелді мен әлі кездестірген жоқпын, – дейді қазақстандық пластикалық хирург Алексей Куимов.
Не десек те, халқымыздың сұлулықты «оймақ ауыз», «күлім көз» деп суреттеген қалыбынан шықпағанда сақтай алатынымыз айдан анық. Әйтпесе қазір жастарымыз жекеменшік сұлулық салондарын ашып, өз бетінше косметолог болып жүргендер арқылы жасанды кірпік жабыстыруға аса үйір.
Бұл туралы да тәжірибелі косметолог Гүлшаш Әубәкірқызы: «Желімнің химиялық құрамы өте жоғары, көзге тигізетін зияны да көп, желіммен жалғанған кірпіктерден кейін адамның өз кірпіктері саудырап түсіп қалады. Косметологиялық желім деген желім болмайды. Мен кірпік жалғатуға келген адамға жасатпауға кеңес беремін. Әрине бір аптаға дейін әдемісі әдемі, ал одан кейінгі зияны қаншама?! Қазір косметология дамыған. Жасанды кірпік жабыстырмай-ақ, кірпікті тітіркендіру арқылы дәрумендермен қоректендіріп, өсіруге болады.
Осы салада жүріп, маман ретінде мен де біраз ой түйдім. Қазір қыз-келіншектер сұлу көріну үшін ботокс сияқты әдістермен бетінің жанын кетіріп, қабағын кескізіп, бәріне барады. Тіпті сапасыз пластикалық операциялардан өліп кетіп жатқандар да бар. Міне, осының бәрі ақша табудың кесірінен болып жатыр. Қаншама әйел өзінің табиғи түрінен айырылып, айнаға қарауға жүрегі дауаламайтын жағдайлар орын алуда. Адамның денсаулығы мен келбетіне қатысты кәсіппен айналысатындар бірінші кезекке адалдықты, сапаны қою керек. Қауіпсіз болуына жауапты болуы тиіс», дейді.
– Ал дорба ауыздарға келсек, қазақтың қиғаш қас, алма мойын, оймақ ауыз деп әспеттеген сұлуларға арналған теңеуі бізден алыстап барады. Қазір ересек әйелдердің өзі ерніне гель құйғызып, аузын дүрдитіп алатыны аса ерсі көрінсе де көп. Біріншіден, бұл табиғи емес екендігі бірден көзге түсіп тұрады, екіншіден, дұрыс сөйлей алмай, жансызданған ернімен тамақты да дұрыс іше алмайды. Біздің қазақ табиғи көрікті бағалаған. Ең сорақысы салпиған еріндер кейде ісініп, қабынып, іріңдеп, соңы жақсы болмай жатады. Мұның арты немен аяқталатынын айтпаса да түсінікті. Бүгінгі таңда ерінді әдемі томпиған, балғын етіп көрсетудің түрлі әдістері мен инновациялық зерттеу жолдарымен жасалған ерін далаптары қазір көптеп табылады, – дейді «Gulshash_spa_salon» директоры Гүлшаш Әубәкірқызы.
Әрине, әйел баласының әдемілікке деген құштарлығында тұрған еш оғаштық жоқ. Бірақ ертеңді ойласақ, денсаулықты, ұрпақты ойласақ, пластикалық хирургке барарда он рет ойланып, қырық рет толғанған жөн-ау.
Айнаш ЕСАЛИ,
«Егемен Қазақстан»
АЛМАТЫ
