Қазақстан • 23 Қазан, 2018

Орталық Азиядағы инвестицияның 70%-і Қазақстанға тиесілі

399 рет
көрсетілді
2 мин
оқу үшін

Қазақстан Орталық Азиядағы тікелей инвестицияларды тарту бойынша көш басында. Жалпы көрсеткіштегі елдің үлесі шамамен 70%-ті құрайды. Бұл туралы бүгін Үкіметтің кезекті отырысында Инвестициялар және даму министрі Жеңіс Қасымбек мәлімдеді.

Орталық Азиядағы инвестицияның 70%-і Қазақстанға тиесілі

Инвестициялық климатты жақсарту мен Қазақстан экономикасына шетелдік инвестицияларды тарту бойынша жүргізіліп жатқан жұмыстар туралы баяндаған Ж. Қасымбек, биыл 9 айда негізгі капиталға салынған инвестициялардың жалпы көлемі 21,6%-ке артып, 7,5 трлн теңгені құрағанын жеткізді. (2017 жылдың 9 айы бойынша - 5,7 триллион теңге).

«Тау-кен өнеркәсібінде (41,4%-ке), құрылыста (37,1% -ке) және өңдеу өнеркәсібінде (26,4%) өсім байқалада. Республикалық деңгейде инвестициялардың басым бөлігі Атырау (35,8%), Астана (9,2%), Алматы (6,5%) сияқты өңірлерге тиесілі. Инвестициялардың өсімі көптеген өңірлерде байқалады.Солардың ішіндегі үш көшбасшы өңірге Шымкент қаласы 2,8 есе, Атырау қаласы 35,6% және Қарағанды облысы - 28,5% көрсеткішке қол жеткізіп отыр. Аталған мерзім аралығында Алматы (0,5%) мен Жамбыл (3,4%) облыстарында инвестиция өсімі азайған, ал, Түркістан (9,2%) облысында төмендеу байқалды»,- деді Инвестициялар және даму министрі.

Айта кетерлігі, биылғы бірінші жартыжылдықтың қорытындысы бойынша тікелей шетелдік инвестициялардың жалпы көлемі 15,4%-ке ұлғайып, 12,3 млрд долларды құрады. Бұл көрсеткіш былтырғы 1-ші жартыжылдықта 10,5 млрд АҚШ доллары шамасында болған еді.

Министрлік келтірген мәлімет бойынша жалпы сомасы 1,4 млрд доллар болатын 12 жоба іске асырылу сатысында, биыл оның ішіндегі құны 1 млрд доллар болатын 8 жоба қарқынды түрде іске асырылып жатыр.

Маңызды жобалардың ішінде инвестиция көлемі - 83 млн долларды құрайтын техникалық газ өндіретін немістің Linde Group компаниясын, инвестиция көлемі - 165 млн долларды құрайтын картоп өңдейтін голландиялық фирманы, инвестиция көлемі - 70 млн долларды құрайтын жоғары сапалы әк өндіретін бельгиялық Carmeuse Group компаниясын, инвестиция көлемі - 220 млн доллар болатын сода күлін өндіретін түріктің Yildirim Holding компаниясын, инвестицияларының көлемі - 194 млн доллар болат құбырларын шығаратын қытайдың CNPC және цемент өндіретін China Gezhouba Cem компанияларын атауға болады.