Елбасымыздың кезекті жолдауын оқи отырып, еліміздің тарих сахнасынан елеулі орын аларлықтай қарқынды дамып келе жатқандығын аңғардым. Тәуелсіздік жылдарынан соң жеткен жетістіктеріміз ауыз толтырып айтарлықтай. Еліміздің мәдени орталығына айналған ару қала – Астана, ЭКСПО-2017 халықаралық көрмесі, халық санының қарқынды өсуі, орташа өмір сүру ұзақтығының өсуі, экономикамыздың өркендеуі, инфрақұрылымды дамытуға бағытталған бағдарламалардың іске асуы заманауи мемлекеттің іргесін нығайтуға зор үлесін қосып отыр.
Жаһандағы өзгерістер мен жаһандық проблемалар және адам еңбегіне талаптың күшеюіне байланысты адам ешқашан өзін дамытуды тоқтатпауы тиіс. Мемлекетте әрбір адам өзін дамытушы, ізденуші тұлға ретінде таныта білсе, сонымен қатар, ізденісінің нәтижесін қолдана отырып әрекет жасаса, еліміздің әл-ауқатының жақсаруы жоғары деңгейге жетеді деп ойлаймын.
Жолдаудың басты мазмұны халықтың тұрмысын жақсарту, халықтың мүддесін қорғау, орта буынның жалақысын көтеру, білім сапасын арттыру, орынсыз шығындарды азайтып, халық денсаулығын нығайту, жастарды қолдау болып табылады. Міне, осылайша халықтың көкейіндегі бірнеше сұрақтардың шешімі табылды. Елімізде халық санының дамылсыз өсуіне байланысты тұрғын үй сұранысы да артып келеді. Жалақыны көтерумен қатар, көркіне көз тоймайтын зәулім үйлерге қол жеткізуге арналған тиімді бағдарламалар халыққа зор қуаныш сыйлап отыр.
Білім беру жүйесіндегі оқыту әдістемесіне бірыңғай стандарт енгізіп, әрбір оқушыны өзінің сұранысындағы мамандыққа бағыттай отырып, оқушы жүктемесін азайту өте орынды шешім. «Педагог мәртебесі туралы» заңның қабылдануы білім беру жүйесінде ұстаздарға оң әсерін тигізеді. Себебі Жолдауда айтылғандай, оларды міндеттен тыс функциялардан арашалайды. Одан бөлек мектепке дейінгі және мектеп жасындағы балалардың, жоғары оқу орнындағы студенттердің білім сапасының жақсаруы бәсекеге қабілетті жастарды даярлауға мүмкіндік береді.
Медицина саласына келер болсақ, тұрғындар денсаулығы үшін тиімді тың мақсаттар алға қойылған. Жаңа заманауи технологияның арқасында электронды медициналық құжатқа қол жеткізу арқылы тұрғындарға жоғары деңгейдегі медициналық қызмет ұсына аламыз. Әлеуметтік маңызы бар аурулар орталығының құрылысын бастау қауіпті аурулардың алдын алып, адам өмірін құтқаруға көмектеседі.
Ұлт денсаулығы үшін денешынықтыру орындарын көбейту – адамдардың спортқа деген қызығушылығын оятып, саламатты өмір салтын ұстануға жетелейді. Дені сау ұлт – мемлекеттің басты байлығы. Елбасымыз қоғамға қатысты маңызды мәселелердің шешімін табуға нақты міндеттер жүктеді. Сот жүйесіне, қаржы жүйесіне, құқық қорғау органдарының жұмысына сапалы өзгерістер енгізді. Президентіміз жастарға үлкен сенім артып және жігер бере отырып, 2019 жылды «Жастар жылы» деп жариялады. Сондықтан жалындаған қазақ жастарын елімізге адал қызмет ету үшін жұмыла еңбектенуге шақырамын.
Мөлдір БАЗАРБАЕВА,
Маңғыстау облыстық наркология диспансерінің дәрігер-эпидемиологы
Ақтау