Әзірге Қазақстан жағынан осы жарысқа кімдердің қатысатыны белгілі. Олар – Ермек Тлауов, Асылжан Бақытжанұлы, Асау Алмабаев, Бақтияр Несіпбек, Евгений Егембердиев, Ғалымжан Қанаев, Артем Резников және тағы басқалары. Бұл жігіттердің барлығы да талай дүрмекте ысылған сақа спортшылар. Сондай-ақ, Қытайда туып-өсіп, әлемдегі ең белді ұйым – UFC-де күш сынасқан тұңғыш қандасымыз Жұмабек Тұрсын да осы кеште өз өнерін ортаға салады. Осы бәсекелер барысында екі бірдей алтын белбеу сарапқа салынады.
Алматыда өтетін жарысқа біз ережесіз жекпе-жек әлемінде зор беделі бар спортшыларды шақыртуды көздеп отырмыз. Қазіргі кезде сол саңлақтар және олардың промоутерлерімен келіссөздер жүргізілуде. Осы іс аяқталғаннан кейін Қазақстанға нақты кімдердің келетінін жариялаймыз. Бір анығы – біз сырттан тек мықтыларды ғана шақыртамыз. Және де осы жарысты тамашалауға құрметті қонақ ретінде осы спорт түрінің хас шебері Хабиб Нұрмағамбетов те келеді деп күтілуде, – дейді «Алаш Прайд» клубының президенті Данияр Қасқарауов.
Ғалым СҮЛЕЙМЕН,
«Egemen Qazaqstan»
