Ақадырдың ауруханасына 55 миллион теңгенің көмегі жасалды

Аймақтар • 07 Ақпан, 2019

Ақадырдың ауруханасына 55 миллион теңгенің көмегі жасалды

243 рет көрсетілді

Қарағанды облысының Шет ауданынына қарасты Ақадыр кентіндегі аурухана медициналық заманауи жабдықтармен және реанимобильмен қамтамасыз етілді.

Бұл игілікті істі «Рухани жаңғыру» бағдарламасы асында Болат Өтемұратовтың қоры және Ақадыр өңірінің тумасы Нұрлан Смағұлов басқаратын «Астана Групп» компаниясы жүзеге асырды. Жомарт жандар ұсынған 55 миллион теңге қаржыға арнайы медициналық автомобиль, кан талдамасын жасайтын автоматты биохимиялық анализатор, фетальді монитор, нәрестелерге арналған фототерапия аппараты және хирургиялық жабдық сатып алынды.

Енді кент ауруханасының мамандары 12 түрлі қан талдауын жасай алатын болды. Ал фетальді монитор анасының жатырында жатқан нәрестенің жүрек қағысын тыңдауға мүмкіндік береді. Жаңа туған сәбилерге арналған фототерапия гипербилирубинемияны емдеудегі консерваторлық әдіс ретінде қолданылады.

– Жаңа жабдықтардың арқасында біз енді 11 түрлі ота жасай аламыз. Заманауи техника бізге және емделушілерге үлкен көмегін тигізеді. Бұдан былай кент тұрғындары сараптамадан өту үшін аудан орталығына немесе қалаға сабылмайтын болды, – дейді Ақадыр кенті ауруханасының бас дәрігері Есенжол Жазыбаев.

Дәрігерлер мен жергілікті тұрғындарды ерекше қуанышқа бөлеген басты сыйлық реанимобиль болды. Енді медиктер қажетті шұғыл көмекті тек Ақадыр кентінің ғана емес, сонымен қатар жақын маңдағы Жұмыскер, Қайрақты, Көктінкөл және Өспен ауылдарының тұрғындарына да көрсете алады.

Шет ауданының әкімдігі мен облыстық денсаулық сақтау басқармасы демеушілік көрсеткен жомарт жандарға деген алғыстарын хат арқылы жеткізді.

Қайрат ӘБІЛДА,

«Егемен Қазақстан»

Қарағанды облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз