Алдымен сөз алған Арман Қожахметов заңның орындалуы мен қоғамдық тәртіп ылғи да Елбасы назарында екенін айтты.
«Өзінің Жолдауында Нұрсұлтан Назарбаев құқық қорғау жүйесіне бірнеше нақты тапсырмалар берді. Елбасының айтуынша, азаматтық қоғамның полицияға деген сенімін тек полицейлердің сапалы кәсіби өсуімен ғана алуға болады. Ол үшін кадр даярлау ісіне деген қасаң көзқарасты өзгерткен дұрыс» деді Арман Қожахметов.
Кадрлардың кәсіби сапасын көтеру үшін көптеген шараларды Полиция департаментінің өзі де қолға алған. Мысалы, өткен жылы көптеген полиция бөлімдерінде фронт-офистер ашылды. Оларға жыл басынан бері 2000-дай тұрғын келіп, жағдайларын айтқан. Кездесуде қылмыскерлерді «Е-уголовное дело» электрондық форматында тексеру мәселесі де қозғалды. Бұл жобаны жүзеге асыру үшін Қостанай облысында 284 арнайы компьютер алынды. Шамамен 400 қылмыстық іс осы жоба арқылы тексеріліп, сотқа жіберілді.
Кездесуде депутаттар полицейлердің әлеуметтік қамтамасыз ету, сыбайлас жемқорлыққа қарсы қимыл, қылмыстық-процессуалдық және әкімшілік заңнамаға байланысты көптеген сұрақтарына жауап берді.
Нәзира Жәрімбет,
«Егемен Қазақстан»
Қостанай
