Қазір облыста «Жібек жолы жастары» волонтерлер қозғалысы бар. Жалпы, өңір бойынша мыңнан астам еріктілердің дерекқоры жасалған. Жуырда ғана волонтерлер 3 апта бойы Тараз қаласындағы 450-ге жуық қамқорлық пен қолдауға мұқтаж отбасыны анықтады.
Осы орайда, облыстық Жастар саясаты мәселелері басқармасының ұйымдастыруымен Тараз қаласында қайырымдылық акциясы өткенін де атап өткен жөн. Акция аясында 220 тұрмысы төмен отбасына көмек көрсетілді. Оның ішінде көп балалы отбасылар, жалғызбасты аналар, мүмкіндігі шектеулі балалары бар жандар. Шара барысында оларға ұн, күнбағыс майы, шай, шекер, күріш, макарон, қарақұмық сияқты азық-түлік табысталды. Әр отбасына киім-кешектер де таратылды.
− Алдағы уақытта қайырымдылық дүкендері іске қосылады. Волонтерлер мен кәсіпкерлердің тығыз байланысын орната отырып, бес жерге арнайы жәшіктер қойылады. Сонымен қатар азық-түлік, киім-кешек сынды тұтыну заттарын жинақтап, тарату жұмыстары қолға алынады. Бұл жұмыс жүйеленіп тұрақты түрде жалғасын табады, − дейді басқарма басшысы Мәди Мәтен.
Айта кетейік, басқарманың мемлекеттік әлеуметтік тапсырысы шеңберінде «Волонтерлер мектебінің жұмысын жүргізу, үйлестіру және олардың әлеуетін дамытуға бағытталған іс-шараларды ұйымдастыруға» 15 миллион теңге қаржы қаралған. Мұндай қайырымдылық шара барлық ауданда бір мезетте ұйымдастырылатын болады.
Хамит ЕСАМАН,
«Еgemen Qazaqstan»
Жамбыл облысы
