Nur Otan партиясы облыстық филиалы төрағасының бірінші орынбасары Нұрлыбек Ожаев: «Бұл маңызды шара партиялардың саяси белсенділігін талап етеді. Әр партия жоспарлы түрде өздерінің конференциялары мен съездерін өткізеді, сондай-ақ сайлауды ұйымдастыру, үміткерлерді ұсыну, тіркеу секілді жекелеген кезеңдер бар. Сайлаушыларға дауыс беруге толық жағдай жасалуы керек», деді.
Қазақстанның Коммунистік халықтық партиясы облыстық филиалының бірінші хатшысы Ерболат Дәулетқазиев 23 сәуірде партия съезі болатынынан хабардар етті. «Қазіргі уақытта еліміздегі этностар өкілдері бір атаның баласындай тату-тәтті өмір сүріп, берекелі тұрмыс құрып отыр. Осының барлығы Елбасы Нұрсұлтан Назарбаевтың дана басшылығы, көреген саясаты мен стратегиясының арқасында жүзеге асып келді. Тұңғыш Президентіміздің осы игі істерін одан әрі жалғастырып отырған Қасым-Жомарт Кемелұлының таяу арада Президент сайлауын өткізуге шешім қабылдауы қазіргі таңдағы кезек күттірмес қадам болғанын түсініп отырмыз. Яғни, ең маңыздысы – еліміздегі саяси және әлеуметтік тұрақтылықты сақтап қалу», деді Е.Дәулетқазиев.